Çdo pasuri e paluajtshme, që shfrytëzohet apo është planifikuar të shfrytëzohet për qëllime biznesi do ti nënshtrohet formulës së re të taksimit referuar draftligjit për pasuritë e paluajtshme i cili është në fazë konsultimi. Por sa do të taksohet kjo kategori? ScanTv ka siguruar shembujt e marrë nga Ministria e Financave, të një barre tipike tatimore për një taksapagues duke supozuar aplikimin e shkallës më të ulët të taksës për atë kategori.
Konkretisht, duke marrë si shembull Bashkinë Tiranë, për kategorinë truall për biznes, me sipërfaqe 1 mijë m2, niveli aktual i taksës është 20 lekë m2 në vit, taksa që paguhet aktualisht është 20 mijë lekë. Marrë në konsideratë çmimin 42.475 lekë/m2, vlera e taksueshme është 42.475.000 lekë, me shkallën e taksës së propozuar në 0.15 %,detyrimi për tu paguar rezulton 63.712 lekë.
Financat kanë marrë si shembull edhe bashkinë Vlorë për kategorinë truall/biznes, me sipërfaqe 1 mijë m2, niveli aktual i taksës është 20 lekëm2 në vit, taksa që paguhet aktualisht është 20 mijë lekë. Marrë në konsideratë çmimin 30.000 lekë/m2, vlera e taksueshme është 30.000.000 lekë, me shkallën e taksës së propozuar në 0.15 %,detyrimi për tu paguar rezulton 45.000 lekë.
E thënë ndryshe, sa më e lartë të jetë vlera e tokës ku ndërtohet një ambient për arsye biznesi, aq më shumë do të paguajnë qytetarët.
Baza e taksës për truallin është sipërfaqja e truallit, në metër katror, në pronësi ose posedim të taksapaguesit. Sipërfaqja e truallit në pronësi përcaktohet sipas dokumentacionit të vërtetimit të pronësisë. Në rast të mungesës së dokumentacionit, poseduesi i truallit bën një vetë-deklarim të sipërfaqes së truallit në posedim, pranë Bashkisë ku ndodhet parcela ndërtimore.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
