Qeveria shpërndau 360 milion lekë subvencione për kompanitë e ujësjellës-kanalizime gjatë vitit 2022. Në raport me një vit më parë, shifra ka pësuar rënie me 20 mln lekë, por gjithsesi fatura mbetet e lartë për shkak të situatës financiare të këtyre shoqërive.
Subvencionet u përfituan vetëm nga 12 shoqëritë rajonale, të krijuara pas reformës së bashkimit, ndërkohë që 3 shoqëritë e tjera, që nuk janë bashkuar ende, u lanë jashtë ndihëms financiare nga qeveria.
Destinacioni i subvencioneve të akorduara, ndryshe nga viti kaluar që ishte vetëm për energjinë, për vitin 2022 ka qenë 38.9% për mbulimin e sigurimeve shoqërore dhe shëndetësore, 13.6% për tatim taksa, 4.8% për paga, 26.1% për energji elektrike, si dhe 16.7% si incentiva për performancë të mirë. Këtë të fundit e kanë përfituar vetëm dy shoqëri UK Rajonale, që janë Korça dhe Pogradeci.
Ndërkohë nevoja reale për subvencione, për mbulimin e kostove të operimit dhe mirëmbajtjes për të gjithë sektorin është 2 840 000 000 lekë, por, realisht janë shpërndarë 360 milion lekë që përbëjnë vetëm 12.7% të nevojës së sektorit për subvencione.
Aktualisht, sektori me të ardhurat e gjeneruara arrin të mbulojë kostot e operimit dhe mirëmbajtjes në nivelin 90.3%, ku vetëm 13 kompani të parareformës arrijnë t’i mbulojnë ato në masën 100%, ndërsa 4 shoqëri i mbulojnë mbi 90%. Ndërkohë, 10 shoqëri UK (në grupin e dytë dhe të tretë) nuk arrijnë të mbulojnë as 50% të kostove të operimit dhe mirëmbajtjes.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
