Rritja e fondeve të vëna në dispozicion për subvencione në bujqësi është pasuar me interes të shtuar nga ana e fermerëve, të cilët kusht kryesor për përfitim, kanë pasur formalizimin e tyre.
Referuar statistikave zyrtare të Drejtorisë së Përgjithshme të Tatimeve, të përpunuara nga ScanTv, përgjatë vitit 2022 janë pajisur me nipt 21.397 fermerë, duke e çuar në total numrin e fermerëve aktiv apo të formalizuar në 84.383. Nëse do ta përkthenim ndryshe, rezulton se janë 1783 fermere të regjistruar në një muaj apo rreth 60 në ditë.
Qarqet që kanë pasur fluksin më të lartë të pajisjes me nipt janë Fieri, Korça, Elbasani, Berati dhe Vlora, ndërsa ma pak fermerë të regjistruar rezultojnë në Lezhë dhe në Sarandë. Numri i fermerëve të pajisur me nipt është rritur vit pas viti, dhe po ta krahasojmë me 2018-ën, regjistrohen mbi 45 mijë fermerë të formalizuar në një periudhë 4 vjecare.
Megjithatë, po të marrim parasysh se në total janë 354 mijë fermerë, rezulton se vetëm 23.8 për qind prej tyre janë të formalizuar dhe që kanë akses në fondet për bujqësinë, si në skemat shtetërore edhe në ato të Bashkimit Europian që aplikohen përmes programit IPARD, duke bërë që më shumë se 76.8 për qind të jenë informalë.
Megjithatë duhet thënë se përgjatë këtij viti përqindja e informalitetit ne bujqësi është ulur ndjeshëm dhe ndikimin kryesor e ka dhënë shpërndarja falas e naftës për punime të mekanizuara në bujqësi ku interesi ka qenë më i lartë dhe kanë përfituar mbi 34 mijë fermerë.
Fondi total i vënë në dispozicion për subevncione në buqësi përgjatë 2022 ka qenë afro 4 miliardë lekë, i cili është menaxhuar nga Agjencia për Zhvillimin Bujqësor dhe Rural dhe ka shkuar për mbështetjen e sektorit bujqësor, blegtorisë, bletarisë, naftën falas dhe fushatën e grurit. Fermerët e pajisur me nipt nuk kanë asnjë detyrim tatimor për të paguar.
Elisabeta Dosku /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
