Turizmi për vitin që lamë pas, ishte kryefjalë në vendin tonë. Por duke parë nga ana tjetër, shërbimet hoteliere pasqyruan më pak se çka u frekuentua, e kësisoj më pak taksa të vjela nga shteti për këto struktura.
Disa nga destinacionet turistike në botë, po aplikojnë taksa të reja turistike, kjo për arsyen e vetme që të mbajnë nën kontroll numrin e vizitorëve pasi mbetjet turistike e lëna pas, ndikojnë në krizën klimatike.
Por, a është Shqipëria një vend që duhet të aplikojë taksa turistike?
Ferjolt Ozuni Ekspert Turizmi: “Ne jemi një nga të paktat vende në Europë për të cilat ende nuk kemi taksa për turistët dhe taksa për shërbimet turistike. E kemi parë gjithmonë si një pengesë krijimin e këtyre taksave apo taksimin e turistëve, por që teknikisht është një nevojë tashmë emergjente për të pasur taksa të kësaj natyre. Është një vend i cili po rritet masivisht në numër turistësh nga viti në vit dhe dhe me këtë lloj rritje edhe me këtë tipologji turizmi, e vetmja mënyrë që ne mund të rikuperojmë sadopak nga dëmet që i krijohet infrastrukturës turistike , por jo vetëm, është që të taksojmë sadopak në çfarëdo lloj mënyre turistët.”
Eksperti Ozuni shprehet se si do të ndikojë kjo taksë turistike në raport me turistët në rast se do të aplikohet.
“Nuk besoj se do të ketë ndonjë impakt negativ imponimi I taksës turistike në paketat turistike në Shqipëri, sepse kur flasim për taksë turistike dhe taksë turisti flasim për vlera të vogla.”
Disa nga vendet që pritet të vendosin taksa të reja turistike për 2024 janë Barcelona, Bali, Venecia dhe disa shtete si Gjermania, Greqia, Holanda, apo Hungaria.
Diamila Leka/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
