Çmimet e energjisë për klientët e liberalizuar, të lidhur në tensionin 35 KV që furnizohen nga Furnizuesi i Shërbimit Universal nën rolin e Furnizuesit të Mundësisë së Fundit, do të pësojë një rënie të lehtë për muajin dhjetor.
Enti Rregullator i Energjisë miratoi çmimet e reja për këtë kategori, duke përcaktuar se 1 kWh për dhjetorin do të kushtojë 30.59 lekë, nga 31.21 lekë që ishte një muaj më parë. Kjo rënië ndikohet nga lëvizjet e kursit të Euros, duke qenë se është pjesë përbërëse e formulës së përllogaritjes së çmimit.
Për të njëjtën arsye, rënie u shënua edhe gjatë muajit nëntor, në raport me tetorin. Ndërkaq, për të gjithë klientët e lidhur në tensionin 35 KV, që kanë shkëputur marrëdhëniet me FSHU-në, në fund të vitit që sapo lamë pas u njoftua një skemë, e cilësuar nga qeveria si lehtësuese e që do garantojë çmime më të favorshme. Më konkretisht, kjo kategori do të mund të blejë energji me 24 euro/kWh, nga Furnizuesi i Tregut të Lirë.
Ky i fundit e siguroi energjinë nga Korporata Elektroenergjetike Shqiptare përmes një ankandi të zhvilluar në datën 23 dhjetor ku morën pjesë edhe 6 kompani të tjera, që ofertuan çmime më të larta.
Megjithatë, muaji janar ka nisur me rënie të ndjeshme të çmimeve të energjisë në tregjet ndërkombëtare, çka do të thotë se ky çmim mund të mos cilësohet më i favorshëm. Gjatë vitit 2022, kur këto biznese u përballën me çmime tejet të larta, qeveria nuk ndërmori asnjë masë.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
