Ledina Elezi/
Profesionistët le të largohen, por nxitini më pas që të rikthehen, me qëllim që dijet e marra nga shtetet e huaja t’i zbatojnë në projekte për zhvillimin e teknologjisë në Shqipëri. Kështu është shprehur Banka Botërore në një raport të publikuar për vendet me të ardhura mesatare.
Lëvizja e ideve, së bashku me mallrat, shërbimet, kapitalin dhe njerëzit, janë kritike për zhvillimin dhe përhapjen e teknologjisë. Sipas Bankës Botërore, vendet me të ardhura mesatare si Shqipëria, nuk duhet të kufizojnë lëvizjen e emigrantëve, pasi emigrimi i tyre mund të jetë një mundësi për vendin e origjinës dhe jo një humbje.
Shkalla në të cilën kjo mund të ndodhë varet nga sa shumë emigrantët mbeten të lidhur me Shqipërinë, si dhe aftësinë e emigrantëve për të grumbulluar njohuri rreth proceseve dhe teknologjive moderne të prodhimit nga vendet ku kanë emigruar. Banka Botërore sugjeron që vendi ynë të krijojë një mjedis të favorshëm për transferimin e njohurive të diasporës duke rregulluar kushte të tilla si qëndrueshmërinë politike, cilësinë e institucioneve dhe një klimë të favorshme investimi. Përveç kësaj, vendet e origjinës duhet të shfrytëzojnë në mënyrë efikase të ardhurat e emigrantëve për të siguruar rritjen ekonomike duke mundësuar një rrjedhë fitimprurëse të remitancave.
Në raportin e publikuar, Banka Botërore ka përmendur edhe një prej arritjeve të Shqipërisë për angazhimin dhe nxitjen e bashkëpunimit me diasporën. Ajo vlerëson krijimin e NanoAlb nga Akademia e Shkencave në vitin 2019, një qendër virtuale për të koordinuar kërkimet e nanoshkencës dhe nanoteknologjisë në institucionet e vendosura në Shqipëri, si dhe në Izrael, Itali, Kosovë, Mal të Zi, Maqedoninë e Veriut, Spanjë, Mbretërinë e Bashkuar dhe Shtetet e Bashkuara.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
