Nga 1 qershori, të gjitha kompanitë e Kosovës me mbi 50 punëtorë ose me qarkullim mbi 10 milionë euro, do të duhet t’i zgjedhin vetë furnizuesit me energji elektrike.
Të enjten më 29 maj, komuniteti i biznesit do të organizojë një protestë, për të shprehur pakënaqësinë dhe shqetësimin lidhur me vendimin e Zyrës së Rregullatorit për Energji për daljen e bizneseve në mënyrë të dhunshme në tregun e lirë të energjisë.
Sipas njoftimit të Odës Ekonomike të Kosovës, protesta do të mbahet nga ora 10:00 e deri në orën 12:00.
“Nëse institucionet nuk reflektojnë dhe nuk ndërmarrin hapa konkretë për të adresuar kërkesat e bizneseve, protestat do të vazhdojnë deri në realizimin e tyre”, thuhet në njoftim.
OEK, në emër të komunitetit të biznesit, i bën thirrje institucioneve që të reflektojnë me urgjencë dhe të krijojnë një fazë kalimtare për përgatitjen graduale të bizneseve, me qëllim të një integrimi të qëndrueshëm dhe të drejtë në tregun e lirë të energjisë.
“Mungesa e përgatitjes së tregut dhe mbështetjes institucionale në këtë proces po krijon pabarazi të theksuar në treg, rrezikim të konkurrueshmërisë, dëme të mëdha për bizneset dhe pasoja të drejtpërdrejta për ekonominë e vendit, përfshirë rënien e prodhimit vendor dhe humbjen e vendeve të punës”, thuhet tutje në këtë njoftim.
Pas përpjekjeve të vazhdueshme dhe kërkesave të shumta për një dialog të sinqertë, transparent dhe konstruktiv me institucionet e vendit, Oda Ekonomike e Kosovës shpreh keqardhjen që nuk është arritur ndonjë bashkëpunim i mirëfilltë për të mundësuar një fazë tranzicioni të drejtë dhe të menaxhueshëm lidhur me procesin e daljes së bizneseve në tregun e lirë të energjisë elektrike.
Po ashtu edhe Oda Ekonomike Amerikane në Kosovë, ka përsëritur shqetësimin për rreziqet madhore, që thuhet se ky tranzicion në formën e tij aktuale, paraqet për aktivitetin ekonomik, punësimin dhe konkurrueshmërinë afatgjatë të Kosovës.
Në reagimin e OEAK-së thuhet se përderisa në parim liberalizimi do të duhej të ishte një objektiv i mirëpritur, suksesi i tij cenohet nga mungesa e kushteve reale të tregut.
“Në Kosovë, pavarësisht furnizuesve të shumtë të licencuar, vetëm njëri është plotësisht funksional, duke i lënë bizneset pa zgjedhje efikase si dhe duke i ekspozuar ato ndaj rritjeve të çmimit të energjisë elektrike prej mbi 200%. Rrjedhimisht, ky nuk është një treg konkurrues, por është një tranzicion i parakohshëm që imponon një shok të menjëhershëm financiar për bizneset që edhe ashtu përballen me presione më të gjera ekonomike”, thuhet në reagim.
Tutje thuhet se këto zhvillime rrezikojnë drejtpërdrejt mijëra vende pune, veçanërisht në industritë ku konsumi i energjisë është më i lartë.
“Varësia e plotë e Kosovës nga energjia elektrike, pa qasje në burime alternative të energjisë si gazi natyror, i bën të paqëndrueshme krahasimet me modelet e tjera rajonale të liberalizimit. Mjedisi energjetik i vendit, kërkon një qasje të kujdesshme në disa faza, e jo një liberalizim për të cilin është dhënë njoftim prej vetëm tre muajsh dhe pa mbështetje kalimtare”, thuhet në njoftim.
Sipas Odës Amerikane mungesa e një Kuvendi funksional dëmton më tej llogaridhënien institucionale dhe ngre shqetësime serioze në lidhje me legjitimitetin e zbatimit të një ndryshimi kaq të madh e pa mbikëqyrje përkatëse.
Anulimi i këtij vendimi dhe atij për shtrenjtim të rrymës është kërkuar ditë më parë nga LDK-ja, e cila ka dorëzuar në ZRRE një kërkesë me nënshkrimet e 30 deputetëve.
Pas takimit janë dhënë deklarata publike se në ZRRE u është thënë se vetëm Qeveria mund ta ndalë shtrenjtimin e rrymës, nëpërmjet subvencionimit prej 50 milionë eurosh.
Sipas informatave të ofruara nga Administrata Tatimore e Kosovës, 851 kompani përmbushin njërin nga dy kushtet për të dalë automatikisht në treg të hapur të furnizimit me energji.
E biznese të ndryshme në Kosovë që plotësojnë njërin nga këto kushte, ditëve të fundit kanë ngritur alarmin se furnizimi në treg të hapur do t’u kushtojë deri në 270 për qind më shtrenjtë, bazuar në ofertat që kanë marrë.
Nga 1 qershori, të gjitha kompanitë me mbi 50 punëtorë ose me qarkullim mbi 10 milionë euro, do të duhet t’i zgjedhin vetë furnizuesit me energji elektrike. Kjo është kundërshtuar nga bizneset, të cilat kanë kërkuar edhe një shtyrje të këtij afati, pasi siç kanë thënë, nuk janë ende të gatshme.
Postimi ” Bizneset e Kosovës protestojnë të enjten, kundërshtojnë daljen në treg të hapur të energjisë ” eshte marre nga Revista Monitor.
