Inflacioni për muajin tetor në Shqipëri arriti në 8,3%, që është edhe niveli më I lartë që nga dhjetori I vitit 1998. Por, parashikimet janë edhe më pesimiste. Në raportin e politikës monetare të publikuar nga Banka e Shqipërisë theksohet se pritjet për inflacionin të bizneseve dhe të agjentëve financiarë kanë vijuar prirjen rritëse në tremujorin e tretë, ndërsa pritjet e konsumatorëve kanë shënuar rënie këtë tremujor.
Pritjet e bizneseve qëndrojnë në nivele më të larta duke parashikuar një inflacion prej 12,7% pas një viti. Konsumatorët presin që inflacioni pas një viti të jetë 9.1%, ndërsa agjentët financiarë duken më të moderuar në pritshmëritë dhe parashikojnë një inflacion në niveln prej 6% pas një viti.
Banka Qendrore parashikon se inflacioni do të kthehet në objektivin 3% brenda gjysmës së parë të vitit 2024. Paralelisht me të, ekonomia shqiptare parashikohet të vazhdojë të shënojë ritme pozitive rritjeje, pavarësisht ngadalësimit të pritur në afatin e shkurtër. Banka e Shqipërisë ka filluar një proces gradual normalizimi të qëndrimit të politikës monetare, nëpërmjet rritjes së normës bazë të interesit duke e çuar më 2 nëntor në nivelin 2.75%.
Por, krahas pritshmërive për rritjen e inflacionit, Banka Qendrore vëren se paga mesatare në sektorin privat ka vazhduar të zgjerohet me ritme dyshifrore gjatë tremujorit të dytë. Rritja vjetore shënoi 11.9%, nga 10.5% një tremujor më parë.
Ndër kontributet sektoriale, spikasin në mënyrë të veçantë degët e “Tregtisë, transportit, akomodimit dhe shërbimit ushqimor”, “Informacionit dhe komunikacionit” dhe “Industrisë”. Nga ana tjetër, normat në rritje të inflacionit kanë ngadalësuar ritmin e rritjes së pagës reale në 5.2% në tremujorin e dytë, kundrejt 6.1% një tremujor më parë.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
