Mungesa e fuqisë punëtore po i shtrëngon bizneset shqiptare për të kërkuar krah pune jashtë vendit. Një kërkesë në rritje të vazhdueshme, që e ka shtyrë edhe qeverinë të nisë lehtësimin e procedurave për punonjësit e huaj.
Një udhëzim i përbashkët i Ministrisë së Brendshme dhe asaj të Ekonomisë dhe Financave i hap rrugë miratimit të lejeve për të huajt brenda 2 javëve, nga rreth 3 muaj që aktualisht procedura zgjat.
“Deri më sot, një procedurë për një vizë, veç faktit që ka shumë dokumentacion merr 2 deri në 3 muaj”, tha Emin Shini, ekspert i tregut të punës.
“Dhe handikapi qëndronte sepse leja e punës ka një afat 90-ditor dhe në shumicën e rasteve bizneset ishin të detyruara të ri-aplikonin për lejet e punës dhe kjo zgjaste akoma dhe më shumë”, tha Florian Zekja, Pro Export Albania.
Referuar udhëzimit, kërkesa për pajisje me leje pune apo rinovimi i saj, do të bëhet tanimë online, me anë të sistemit elektronik ndaj drejtorisë së kufirit dhe migracionit në rajonin ku ndodhet biznesi.
“Në fazën fillestare mua më duket shumë e vështirë që të arrihet. Nisma është shumë e mirë, por efektet e saj besoj do të vijnë në afat mesëm. Si fillim mbetet gati e pamundur që leja të miratohet brenda 10 ditëve punë”, tha Emin Shini, ekspert i tregut të punës.
Më optimistë janë përfaqësues të sipërmarrjeve në vend. “Me thjeshtëzimin e procedurës, patjetër që do të ketë një ndikim pozitiv për prurjen e punonjësve të huaj nga vendet e treta e cila është një kërkesë emergjente jo vetëm e sektorit të manifakturës, por gjithë sipërmarrjeve thuajse”, tha Florian Zekja, Pro Export Albania.
Vetëm sektori i manifakturës përllogarit një nevojë për rreth 20 mijë punonjës. Bashkë me bujqësinë dhe turizmin, ndërtimin e peshkimin, nevojat mund të arrijnë deri në 100 mijë punonjës.
Burimi: A2 CNN
