Sipas të dhënave të fundit të Bankës së Shqipërisë, investimet nga Kosova kanë njohur rritje të ndjeshme, për vitin 2025 arritën në 186 milionë euro, me dyfishimkrahasuar me të njëjtën periudhë të një viti më parë.
Investimet e bizneseve nga Kosova drejt Shqipëria po rriten me ritme të shpejta, duke reflektuar jo vetëm zgjerimin e tyre natyral, por edhe një realitet gjithnjë e më shqetësues: mungesën e kushteve për zhvillim brenda vendit.
Sipas të dhënave të fundit të Bankës së Shqipërisë, për vitin 2025, investimet nga Kosova arritën në 186 milionë euro, me dyfishim krahasuar me një vit më parë. Këto shifra e vendosin Kosovën ndër investitorin e tretë më të madh në Shqipëri në 2025-n, pas Holandës (202 milionë euro) dhe Italisë (187 milionë euro).
Ndërkohë, stoku total i investimeve ka shkuar në rreth 520 milionë euro, nga zero që ihin në 2014-n.
Në muajt e fundit, disa nga kompanitë më të mëdha nga Kosova kanë bërë lëvizje strategjike në tregun shqiptar.
Rrjeti “Viva Fresh Store” bleu “SPAR Albania” për 36.4 milionë euro, ndërsa u mbështet edhe me financim nga Banka Europiane për Rindërtim dhe Zhvillim (BERZH), në një nga huatë më të mëdha të dhëna ndonjëherë për një kompani kosovare.
Po ashtu, “Albi Holding” mori në pronësi “Fashion Group Albania” për 7.6 milionë euro, duke forcuar prezencën në sektorin e modës me marka ndërkombëtare.
Në sektorin e ushqimit të shpejtë, kompania KAN nga Kosova mori drejtimin e rrjetit KFC në Shqipëri, duke paralajmëruar hapjen e 20 pikave të reja në të gjithë vendin.
Megjithatë, prapa këtij zgjerimi që në pamje të parë duket pozitiv, qëndron një kritikë e fortë ndaj kushteve në Kosovë.
Përfaqësues të biznesit theksojnë se problemi nuk është mungesa e ambicies për zgjerim, por mungesa e stabilitetit dhe mbështetjes institucionale në vend.
Megjithatë, përfaqësuesit e biznesit e lidhin këtë trend jo vetëm me zgjerimin, por edhe me problemet në Kosovë.
Afaristi Ramiz Kelmendi ka deklaruar se do të vazhdojnë investimet ne Shqipëri.
“Ne si ELKOS/ETC vazhdojmë të investojmë në Shqipëri… qëllimi ynë është të zgjerohemi sa më shumë dhe ky zgjerim po ndodh në vendin tonë fqinj”.
Kompanitë e Kosovës po zbarkojnë në Shqipëri
Por ai paralajmëron se situata është më serioze.
“Disa biznese janë duke e lënë Kosovën krejt dhe duke shkuar në Shqipëri. Pra, jo duke u zgjeruar, por duke u zhvendosur. Arsyeja lidhet drejtpërdrejt me gjendjen në vend. Tani për tani, ne nuk kemi institucione funksionale… nuk ka stabilitet dhe siguri”.
Nga ana tjetër, përfaqësues të komunitetit të biznesit theksojnë vështirësitë konkrete që po i shtyjnë kompanitë jashtë vendit.
Kushtrim Ahmeti, drejtor në Dhomën e Tregtisë dhe Industrisë së Kosovës, thotë për “Monitor” se Shqipëria prej kohësh është tërheqëse për shumë kompani nga Kosova.
“Shqipëria, prej një kohe të gjatë, është bërë pikë interesi për shumë kompani nga Kosova. Një nga faktorët kryesorë që ndikon në këtë lëvizje ka të bëjë me nevojën e biznesit tonë që të shtrijë më shumë aktivitetin e tij, pasi vendi ynë fatkeqësisht nuk po ofron shumë mundësi. Këtu nuk duhet lënë anash edhe rritja e turistëve, të cilët po shtojnë dhe blerjet. Shqipëria, prej një kohe të gjatë, po ofron incentiva të ndryshme për bizneset e Kosovës, qoftë në formë zyrtare apo atë jozyrtare. Përpos kompanive në shërbim, apo edhe hipermarketet e njohura të Kosovës, drejt Shqipërisë po shkojnë edhe kompani prodhimi, për shkak të shumë problemeve me të cilat po përballen në Kosovë”.
Ai thekson se vështirësitë e të bërit biznes në Kosovë kanë marrë përmasa më të mëdha vitet e fundit, kryesisht për shkak të vendimeve të institucioneve të nxjerra pa komunikim dhe bashkëpunim me komunitetin e biznesit.
“Vështirësitë e të bërit biznes viteve të fundit janë rritur shumë. P.sh., ne si Dhomë e Tregtisë dhe Industrisë Kosovë, ka rreth dy vjet që po merremi me zhbllokimin e shumë kompanive, bllokadë të cilave ua ka shkaktuar Ligji për Pronën Publike.
Në këtë situatë, Shqipëria po shihet si një alternativë më e favorshme.
Sipas vlerësimeve të bizneseve, atje ofrohen kushte më të lehta operimi, treg më i madh dhe mundësi më të mëdha zhvillimi. Kjo reflektohet edhe në shifra, pasi mbi 600 kompani nga Kosova kanë hapur degë apo biznese në Shqipëri vitet e fundit, duke treguar një trend të qartë të orientimit të kapitalit jashtë vendit.
Bizneset e Kosovës po ikin drejt Shqipërisë | Revista Monitor
Agim Shahini, kryetar i aleancës kosovare të bizneseve e përshkruan situatën me tone alarmuese.
“Kosova gjatë vitit 2025 nuk ka pasur as Kuvend funksional dhe as Qeveri të qëndrueshme… ky është dështim i nivelit më të lartë. Importet kanë arritur në mbi 7 miliardë euro në vit, ndërsa prodhimi vendas po bie çdo muaj”.
Sipas tij, trendi i largimit të investitorëve është i qartë: “Po shohim një valë të qartë të largimit të kapitalit nga Kosova drejt vendeve fqinje, veçanërisht drejt Shqipërisë… kjo ndodh për shkak të mungesës së stabilitetit politik dhe kushteve për zhvillim”./ Fatos Shala
Burimi: BSH
Postimi ” Brenda një viti 186 milionë euro investime, bizneset e Kosovës “strehohen” në Shqipëri ” eshte marre nga Revista Monitor.
