Banka e Shqipërisë po punon me Bankën Botërore për hartimin e një rregulloreje për mbrojtjen e konsumatorit nga institucionet financiare në tërësi, qofshin ato banka apo subjekte jo banka. Në një takim me mediat, pa praninë e kamerave, Drejtori i Departamentit të Mbikëqyrjes Financiare në Bankën Qendrore, Deniz Deralla, njoftoi se drafti i rregullores pritet të jetë gati në shtator, ndërsa brenda vitit do të jetë në zbatim.
Për arsye se një pjesë e konsiderueshme e shoqërive jo banka pranojnë të japin kredi për persona me zero aftësi paguese, të cilët janë shumë problematikë dhe krijojnë ngërçe në sistem, rregullorja e re parashikon krijimin e një liste të individëve që nuk duhet t’u jepet kredi nga subjektet financiare jo banka. Këtu përfshihen edhe persona që kanë probleme të shëndetit mendor apo kur familjarët e tyre kërkojnë që të mos u jepet kredi atyre për arsye specifike.
Sipas Derallës, 90% e kredive të Micro Credit Albania dhe Final janë në dorë të përmbaruesve, ndërkohë që 3000 klientë vazhdojnë të shlyejnë rregullisht kreditë e tyre. Edhe këto 3000 raste po verifikohen, pasi ka pasur ankesa të klientëve për abuzime nga dy subjektet. Megjithatë, krahasuar me numrin e madh të klientëve të MCA dhe Final, numri i ankesave ka qenë tepër i vogël.
Banka e Shqipërisë ka propozuar hartimin e një ligji për përmbaruesit, i cili do të parashikojë qartë veprimet që përmbaruesi duhet të ndërmarrë pas vendimit të gjykatës për funksionimin e shoqërive jo banka.
Aktualisht, Banka Qendrore është në pritje të caktimit të një likuidatori nga Ministria e Drejtësisë që të administrojë portofolin e kredive të subjekteve financiare jo banka. Me mbylljen e portofolit të kredive të MCA dhe Final brenda këtij viti, parashikohet që këto dy shoqëri të kalojnë përfundimisht në Agjencinë për Administrimin e Pasurive të Sekuestruara dhe Konfiskuara.
Ledina Elezi/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
