Me synimin për t’u anëtarësuar gjatë muajit qershor të këtij viti në Tregun Unik të Pagesave në Euro, njohur ndryshe si SEPA, Banka e Shqipërisë po krijon edhe infrastrukturën e nevojshme.
Së fundmi, ky institucion ka hartuar projektrregulloren “Për përcaktimin e kërkesave për transfertat e kreditit dhe të debitimit direkt në euro”. Pas publikimit në Fletoren Zyrtare dhe Buletinin zyrtar të Bankës së Shqipërisë, ky dokument pritet të hyjë në fuqi.
Kjo rregullore përcakton kërkesat për transaksionet e transfertave të kreditit dhe të debitimit direkt të kryera në monedhën Euro brenda Shqipërisë dhe ndërmjet Shqipërisë dhe zones SEPA.
Rregullore zbatohet pa rënë ndesh me kërkesat e legjislacionit për parandalimin e pastrimit të parave dhe financimin e terrorizmit, si dhe rregullat që administrojnë ekzekutimin e transfertave të kreditit dhe transaksioneve të debitimit direkt në Lekë. Rregullorja do të zbatohet edhe për transfertat e kreditit dhe debitimet direkte në Lekë, për aq sa është e mundur nga pikëpamja teknike dhe operacionale.
Në këtë document janë të përcaktuara të gjitha detajet teknike se si do të funksionojnë transfertat bankare pasi Shqipëria të hyjë në SEPA.
Sipas Bankës së Shqipërisë ngritja e sistemit ndërbankar në vend për transfertat në euro nga 2022-shi i kurseu qytetarëve 47 milionë euro, ndërsa me integrimin në Tregun Unik të Pagesave në Euro, kursimet do të rriten në disa herë.
Parashikohet që në vitin e parë mund të jenë rreth 20 milion euro kursime nga komisione duke përfshirë individët dhe bizneset. Ndërsa në të ardhmen, shifrat do të jenë edhe më të larta.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
