Inflacioni bazë u rrit për të katërtin muaj radhazi në qershor, duke konfirmuar një rritje graduale të komponentit më të qëndrueshëm të inflacionit në ekonomi
Sipas të dhënave nga Banka e Shqipërisë, inflacioni bazë u rrit në 2.69%, nga 2.54% që kishte qenë për majin.
Inflacioni bazë tashmë po përvijon një tendencë të qëndrueshme të rritjes me bazë vjetore. Në qershorin e vitit të kaluar ai kishte qenë në nivelin 2.21%
Nënshporta që mat inflacionin bazë është zgjeruar lehtësisht me rishikimin e peshave në vitin 2025, në 69.6% të totalit të shportës së IÇK-së, nga 69% në vitin 2024.
Inflacioni bazë përjashton kryesisht ato produkte që kanë luhatshmëri të lartë, produktet ushqimore dhe ato energjetike dhe ka si qëllim kryesor ta zhveshë rritjen e përgjithshme të çmimeve nga luhatjet me natyrë më afatshkurtër.
Në fillim të këtij muaji, Banka e Shqipërisë vendosi të ulë normën bazë të interesit nga 2.75% në 2.5%.
Ulja e normës bazë duket se u nxit nga vijimësia e inflacionit të ulët të importuar (ku një ndikim vijon të ketë edhe Leku i fortë në kursin e këmbimit), por edhe rritja ekonomike më e dobët se pritshmëritë e Bankës Qendrore në tremujorin e parë të vitit.
Megjithatë, fakti që inflacioni bazë është më i lartë se inflacioni total dhe po vazhdon të rritet prej disa muajsh duket një sinjal se presionet më të qëndrueshme inflacioniste në ekonomi mund të jenë në rritje.
Inflacioni bazë është i lidhur në një shkallë më të madhe me presionet e brendshme inflacioniste, që pas vitit 2022 janë ndikuar shumë prej rritjes së kostos së punës të bizneseve.
Duke pasqyruar rritjen më të fortë të inflacionit të shërbimeve dhe të mallrave me afat të gjatë përdorimi, Banka e Shqipërisë vlerëson se inflacioni bazë e zgjeroi kontributin në formimin e inflacionit total në pjesën e parë të këtij viti.
Vlerat e inflacionit bazë qëndrojnë mbi mesataret e tyre të dekadës së fundit.
Paralelisht me inflacionin bazë, edhe inflacioni bazë neto për qershorin u rrit në 2.45%, nga 2.22% që kishte qenë për prillin. Inflacioni bazë neto përjashton më tej nga inflacioni edhe nëngrupet e ushqimeve të përpunuara (përfshirë bukën dhe drithërat) dhe matet mbi 44.6% të shoqërisë së IÇK-së.
Ndërkohë, inflacioni që përjashton të gjitha produktet ushqimore dhe energjetike për muajin qershor u rrit në 2.38%, nga 2.2% që kishte qenë në muajin maj.
Sipas INSTAT, inflacioni total në ekonomi, i matur për të gjithë shportën e mallrave dhe shërbimeve të konsumit, ra lehtë në muajin maj, në 2.4%, nga 2.2% që kishte qenë për muajin prill dhe 2.1% që kishte qenë një vit më parë./ E.Shehu
Burimi: Banka e Shqipërisë
Postimi ” BSH uli normat e interesit, por inflacioni bazë u rrit për të katërtin muaj radhazi në qershor ” eshte marre nga Revista Monitor.
