Bursa Shqiptare e Energjisë parashikon që vitin e ardhshëm të arkëtojë 135 milionë lekë nga tarifat që vjel në bazë të volumit të transaksioneve të energjisë për dy zonat ku operon.
Në kërkesën e ALPEX për përcaktimin e tarifave të Operatorit të Emëruar të Tregut të Energjisë Elektrike që tashmë është nën shqyrtimin e ERE Bursa parashikon që pjesën më të madhe ta arkëtojë nga zona e ofertimit të Shqipërisë.
“Duke konsideruar volumin e transaksioneve të energjisë të tregtuara gjatë vitit 2024 në të dy zonat e ofertimit, duke marrë parasysh trendin e volumeve të transaksioneve të energjisë të tregtuara e përgjatë 9- mujorit të vitit 2025 në të dy zonat e ofertimit, si dhe duke konsideruar disa ndryshime që priten gjatë vitit 2026, parashikohet që të ardhurat në vitin 2026 të jenë rreth 135,962,909 Lekë, të ndara si në vijim; Për zonën e ofertimit të Shqipërisë janë parashikuar 77,394,544 Lekë Për zonën e ofertimit të Kosovës janë parashikuar 58,568,366 Lekë” thuhet në dokumentin që APLEX ka paraqitur pranë Entit.
Në vitin aktual të ardhurat e pritshme parashikon 87 milionë lekë apo 870 mijë euro.
Bursa e energjisë nisi operimin në prill 2023 teksa për Kosovën kjo u bë efektive vetëm në vitin 2024. Sipas të dhënave të fundit aktualisht janë të anëtarësuar rreth 42 Anëtarë të Bursës dhe 5 Anëtar të Përgjithshëm Klerimi.
“Gjithsej për zonën e ofertimit të Shqipërisë janë: 26 Anëtarë Burse nga të cilët 5 janë shoqëri publike dhe 21 janë shoqëri private. 1 Anëtarë Burse është në proces anëtarësimi. 2 Anëtar të Përgjithshëm Klerimi, Raiffeisen Bank dhe Tirana Bank. Gjithsej për zonën e ofertimit të Kosovës janë: 16 Anëtarë Burse nga të cilët 3 janë shoqëri publike dhe 13 janë shoqëri private. 1 Anëtarë Burse është në proces anëtarësimi. 3 Anëtar të Përgjithshëm Klerimi, Procredit Bank, Banka Kombëtare Tregtare dhe Raiffeisen Bank në Kosovë” nënvizon ALPEX. / N.Maho
Postimi ” Bursa e Energjisë parashikon 1.35 mln euro të ardhura nga transaksionet ne 2026 ” eshte marre nga Revista Monitor.
