Viti 2022 ka rezultuar i mbarë sa i takon të ardhurave të mbledhura nga kontributet e sigurimeve shoqërore dhe shëndetësore në buxhetin e shtetit. Sipas të dhënave zyrtare të Ministrisë së Financave, përgjatë vitit që lamë pas janë mbledhur 118.5 miliardë lekë, apo 8.3 për qind më shumë se viti 2021.
Rritja e të ardhurave është një lajm i mirë për një skemë që ndër vite është deficitare dhe kërkon subvencion të vazhdueshëm nga shteti për shkak të numrit të ulët të kontribuuesve dhe numrit të lartë të përfituesve. Po ashtu, edhe po ta krahasojmë me vitet e mëparshme që nga 2018 dhe në vijim, sërish të ardhurat nga kontributet kanë njohur një rritje të konsiderueshme.
Por çfarë po e “kuron” skemën e pensioneve në një kohë kur numri i kontribuuesve vijon të jetë më i ulët se përfituesit dhe emigracioni është një fenomen që nuk po njeh ndalesë? Të ardhurat e rritura përgjatë vitit që lamë pas i atribuohen më së shumti reformës antiinfomalitet e cila u fokusua tek nëndeklarimi i pagave në disa sektorë, duke bërë që bizneset të cilët kishin punonjës të siguruar me pagë minimale por që paga nuk përkonte me pozicionin e tyre, të bënin lëvizjet e kërkuara dhe të rrisnin deklarimin nga frika e gjobave tatimore.
Po ashtu, dy vendimet për rritjen e pagës minimale nga 30 mijë lekë në 34 mijë lekë që është aktualisht, sollën rritje të kontributeve të sigurimeve shoqërore dhe shëndetësore për të gjithë punonjësit, çka rrjedhimisht rriti të ardhurat në buxhetin e shtetit.
Ky trend të ardhurash pritet të vijojë edhe gjatë këtij viti, duke qenë se është paralajmëruar rritje e pagës minimale në 40 mijë lekë. Megjithatë pavarësisht rritjes së të ardhurave gjatë vitit 2022, sërish skema vijon të jetë deficitare, pasi shpenzimet e planifikuara për në skemën e sigurimeve shoqërore arrijnë në 148.1 miliardë lekë, nga të cilat 138.8 miliardë janë shpenzuar deri në muajin Nëntor, duke qenë se shifrat e realizmit vjetor ende nuk janë publikuar.
Kështu me këto të dhëna rezulton se deficiti i skemës arrin në 29.6 miliardë lekë, apo 1.6 miliardë lekë më i lartë se në vitin 2021. Çka do të thotë se pavarësisht përpjekjeve për të rritur të ardhurat në skemën e pensioneve, sërish problemi kryesor i cili është zbutja e deficitit, nuk po arrihet.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
