Rritja e çmimeve të frutave dhe perimeve në prag të Vitit të Ri ka gjeneruar debat midis deputetit të Partisë Socialiste, Erion Braçe dhe administratës tatimore.
Përmes një videoje të postuar në rrjetet sociale, deputeti denoncoi rritjen abuzive të çmimeve dhe shitjen pa faturë tatimore të produkteve, duke kërkuar më shumë kontrolle nga inspektorët.
Ky denoncim sipas Braçes ka bërë që inspektorët të dalin në terren, duke penalizuar tregtarët, por sipas tij qasja ka qenë tërësisht e gabuar pasi gjobat nuk janë efektive, por e nevojshme është lëshimi I faturës.
Pas këtyre daljeve të deputetit, reagoi Drejtoria e Përgjithshme e Tatimeve, sipas të cilës monitorimi dhe verifikimi i tregjeve, ku operojnë Bizneset e Mëdha është procedurë standarde, që ndiqet çdo vit nga strukturat e saj.
Prezenca e Tatimeve në tregun qendror ka nisur në fillim të muajit dhjetor, në zbatim të planit operacional, ku në fokus janë tregjet e mëdha dhe qarkullimi i shtuar i mallrave në transport nga ana e bizneseve, që tregtojnë me shumicë, në kuadër të festave të Fundvitit. Kështu që deklarata e deputetit në media për daljen e strukturave të Administratës Tatimore pas denoncimeve të tij është e pasaktë! Kujtojmë Z. Braçe, dhe sqarojmë publikun, që Bizneset e vogla janë me 0 Tatim Fitimi dhe 0 TVSH. Kështu që lëshimi apo jo i Faturës Tatimore, edhe pse është shkelje ligjore, nuk do të ndryshojë në asnjë mënyrë çmimet, sikurse pretendohet, pasi çmimet përcaktohen nga Ofertë-Kërkesa si në çdo ekonomi të liberalizuar.
Në një dalje të tretë, deputeti Braçe e konsideroi deklaratën e Drejtorisë së Tatimeve si mbrojte ndaj tregtarëve abuzues dhe grabitës, ndërsa shtoi se ligjshmëria dhe transparenca e çdo shitje e blerje në treg është thelbi për çmime të drejta.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
