Prodhuesit me përparësi të energjisë që janë HEC-et me kapacitet të instaluar deri në 15MW do të vazhdojnë të shesin energjinë tek Furnizuesi i Tregut të Lirë me 10 lekë/kWh edhe gjatë vitit 2026.
Enti Rregullator i Energjisë miratoi këtë javë vendimin duke sqaruar formulën sesi është llogaritur ky çmim ku përveç bazës që është Bursa Hungareze por edhe ajo Shqiptare prevalon vendimi i qeverisë i vitit 2023 që përcakton një tavan jo më shumë se 10 lekë/kWh.
Enti argumenton se nga të dhënat paraprake të publikuara nga Bursa Hungareze e Energjisë (HUPX), çmimi i deritanishëm mesatar për periudhën 10-mujore të tregut të ditës në avancë për vitin 2025 rezulton 106.55 euro/MWh dhe çmimi vjetor i blerjes, bazuar në formulën e metodologjisë në fuqi, rezulton 12.53 lekë/kWh.
“Në kuptim të ligjit nr. 24/2023, i cili parashikon se kriteret e llogaritjes së çmimit do të bazohen në çmimin e tregut të organizuar të energjisë elektrike, për referencë paraqiten edhe të dhënat e çmimit mesatar klerues të bursës shqiptare të energjisë ALPEX, ku për periudhën 10-mujore të vitit 2025 rezulton 118.93 euro/MWh, dhe çmimi vjetor i blerjes, referuar tregut shqiptar dhe në zbatim të formulës së përdorur në metodologjinë në fuqi, rezulton 13.99 lekë/kWh. – Të dyja vlerat e llogaritura rezultojnë mbi nivelin maksimal prej 10 lekë/kWh (pa TVSH), të përcaktuar në shkronjën “d” të pikës 2 të VKM-së nr. 687, datë 22.11.2017, të ndryshuar me VKM-në nr. 67, datë 08.02.2023” thuhet në vendim.
Në finale Enti nënvizon se bazuar në llogaritjet e kryera sipas përcaktimeve të metodologjisë për përcaktimin e çmimit vjetor të blerjes së energjisë elektrike, që do t’u paguhet prodhuesve ekzistues me përparësi, miratuar me VKM-në nr. 687, datë 22.11.2017, e ndryshuar, si dhe nivelit maksimal të çmimit të llogaritur të blerjes së energjisë elektrike të përcaktuar në gërmën “d” të saj, çmimi i blerjes së energjisë elektrike që do t’u paguhet prodhuesve ekzistues me përparësi për vitin 2026 duhet të jetë 10 lekë/kWh (pa TVSH).
Pikërisht ky është edhe çmimi që është miratuar dhe që do të mbetet në fuqi edhe për vitin e ardhshëm.
Postimi ” Çmimi i energjisë për prodhuesit me përparësi për vitin 2026 mbetet 10 lekë/kWh ” eshte marre nga Revista Monitor.
