Me uljen e temperaturave janë rikthyer edhe reduktimet e energjisë elektrike në Kosovë. Gjatë 24 orëve të fundit qytetarët e Kosovës janë përballur me mungesë të madhe të energjisë elektrike.
Gjatë ditës se djeshme, kompania KESCO u ka dërguar qytetarëve mesazhe, ku ka kërkuar që të kursehet energjia elektrike.
“Të nderuar konsumatorë, konsumimi i lartë po mbingarkon asetet tona, po rrezikon dëmtimin e tyre dhe ndërprerjen e energjisë. Ju lutemi, kurseni energjinë”, është thënë në mesazh e KECO-s.
Kurse, Ministria e Ekonomisë ka njoftuar se mbrëmë vonë ka mbajtur takim të përbashkët me KOSTT dhe KEDS për të trajtuar situatën e furnizimit me energji elektrike pasi që qytetarët e disa komunave të Kosovës kanë raportuar ankesa gjatë ditëve të fundit.
Ministria e Ekonomisë përmes një komunikate për media, bën të ditur se, KOSTT dhe KEDS kanë raportuar se, “me uljen e temperaturave, konsumi i energjisë elektrike ka arritur nivele shumë të larta, mbi 1400 MW në kohë të caktuara. Si rezultat, sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin”
“Vështirësitë janë hasur veçanërisht në komunat e Ferizajt, Lipjanit, Gjakovës, Malishevës, Gjilanit, Shtimes, Istogut dhe Prizrenit, dhe si rrjedhojë mund të jenë ndikuar edhe disa nga vendbanimet të cilat furnizohen nga linjat e afektuara. Ndërsa, ekipet e KOSTT-it dhe KEDS-it janë duke punuar pandërprerë në terren për të minimizuar ndikimin në furnizim të qytetarëve”, thuhet në komunikatën e Ministrisë së Ekonomisë.
Tutje kjo ministri njofton se gjatë javës në vijim pritet të përfundohet ndërtimi i nënstacionit të tretë në Ferizaj nga KOSTT, që sipas tyre, pritet të zgjidh problemet me energji elektrike në këtë komunë.
“Lusim qytetarët që aty ku është e mundur të përdorin burime alternative për ngrohje si druri ose peleti, si dhe të zhvendosin konsumin e energjisë elektrike pas mesnatës”.
Mungesa e energjisë ka nxitur reagime të shumta të opozitës, shoqërisë civile dhe qytetarëve.
Sekretarja e Përgjithshme e PDK-së, Vlora Çitaku, ka bërë me dije se në vigjilje të festave të fundivitit qytetarët e Kosovës kanë pranuar dy dhurata nga Qeveria Kurti.
Ajo ka treguar se dhurata e parë kishte të bënte me ndërprerje të gjata të energjisë elektrike.
Në profilin e saj në Facebook, ajo ka shkruar se dhurata e dytë ishin paralajmërimet e Kurtit për sulme të reja nga Serbia.
“Dje në vigjile të Kërshëndellave, qytetarët e Kosovës pranuan dy “dhurata” nga qeveria. E para, ndërprerjet e gjata të energjisë elektrike shoqëruar me faturat astronomike për qytetarët tanë, dhe e dyta, paralajmërimet apokaliptike të Kryeministrit për sulme nga Serbia. Pra, mantra e vetme operuese e kësaj kaste udhëheqësish është mbjellja e pasigurisë, paparashikueshmërisë, dhe frikës. Turp kryeministër. Keni ardhë në detyrë me mandat të fuqishëm për të zgjidhur probleme, jo për tu bërë falltor. Kryeministër, detyra e juaj është t’i mbani dritat ndezur, t’i parandaloni sulmet, dhe të krijoni ambient të sigurtë. E jo të na thuani “shujë, se mundet me u ba edhe ma keq”. Jo. Kosova mundet ma mirë”, ka shkruar Çitaku.
Kandidati i LDK-së për deputet, Berat Rukiqi, mungesën e energjisë elektrike e ka lidhur me aferat korruptive të Qeverisë.
Në profilin e tij në Facebook, ai ka shkruar se ky është “efekti GEN’.
“GEN Efekt Viti 2024, jo 1924”, ka shkruar Rukiqi.
Kurse, aktori Fehmi Ferati, i cili është nga Mitrovica, ka treguar se ka pasur reduktime deri në 8 orë.
“Qytetari pa rrymë gati 8 orë ndërkohë KESCO i dërgonte mesazh “Kurseni rrymën…!”, ka shkruar ai në profilin e tij në Facebook.
Edhe më i ashpër me Qeverinë Kurti ka qenë gazetari Berat Buzhala.
Ai ka bërë me dije se mungesa e energjisë elektrike është si pasojë e paaftësisë së Qeverisë Kurti.
“Martin Berishaj ka rryme. Albin Kurti ka rryme. Kane edhe familja e tyne. Na nuk kena. Ju nuk keni. Familjet tona nuk kane. Paguajme edhe kur s’kemi. Paguajme shtrenjte. Mos e harroni diten e votimit. Edhe kane vjedhe. Kane vjedhe ne bashkepunim me GEN Beograd dhe me kompanite greke”, ka shkruar Buzhala në profilin e tij.
Termocentralet “Kosova A” dhe “Kosova B”, që ndodhen në qytetin e Obiliqit, janë burimet kryesore të rrymës me anë të djegies së thëngjillit, ndonëse nuk i plotësojnë nevojat e shtetit, kryesisht për shkak të vjetërsisë.
Nevojat e Kosovës për energji elektrike i tejkalojnë kapacitetet e prodhimit, sidomos gjatë dimrit.
Kosova ka kapacitet të prodhojë rreth 800 megavate në orë, kurse nevojat e saj, në ditë dimri, arrijnë deri në 1.300 megavate në orë. Këtë diferencë, ajo zakonisht e importon nga jashtë.
Postimi ” “Deri në 8 orë pa rrymë”, Kosova përballet me reduktime të ashpra të energjisë ” eshte marre nga Revista Monitor.
