Brenda muajit gusht, konsumatorët e mëdhënj të energjisë do të duhet të dorëzojnë Raportet e Auditimit të Energjise dhe Planet e Veprimit për Zbatimin e Masave të Kursimit të Energjisë. Dokumentet duhet të dorëzohen pranë Agjencisë për Eficiencën e Energjisë, sipas të cilës këto subjekte kanë marrë edhe njoftimet përkatëse në muajin shkurt dhe prill të këtij viti.
Sipas legjislacionit, në fuqi çdo subjekt që klasifikohet si konsumator i madh energjie ka detyrimin për të kryer auditimin energjetik, ndërsa brenda dy vjetësh nga marrja e rezultateve të auditimit, duhet të ndërmarrë masat dhe kryejë veprimet e rekomanduara për përmirësimin e eficiencës së energjisë.
Sipas të dhënave zyrtare, aktualisht numërohen 175 konsumatorë të mëdhenj energjie, duke përfshirë institucione publike sikurse janë ujësjllësit, spitalet, burgjet, etj., por edhe konsumatorë privatë. Këta konsumatorë renditen si të tillë, pasi çdo vit konsumojnë më shumë se 1 mln kwh energji.
Ndërkohë që, detyrimet ligjore që kanë të gjithë subjektet që klasifikohen si konsumatorë të mëdhenj të energjisë, në drejtim të eficencës së energjisë në ndërtesa u aktivizuan në qershor të vitit 2020, kohë kur u krye certifikimi i audituesve të parë të energjisë. Paralelisht, me këto detyrime, personat juridikë, publikë ose privatë, që kategorizohen si konsumatorë të mëdhenj energjie, janë të detyruar të caktojnë një menaxher energjie.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
