Banka Europiane për Rindërtim dhe Zhvillim parashikon që ekonomia shqiptare të ngadalësohet në vitin 2023, pas një zhvillimi pozitiv mbi pritshmëritë menjëherë pas Pandemisë. BERZH ka publikuar Raportin e Tranzicionit 2022-2023, ku parashikon që ritmi i rritjes së ekonomisë shqiptare të frenohet ndjeshëm nga 8.5% në vitin 2021. Banka parashikon që rritja të jetë 3%, si për vitin 2022, ashtu edhe për vitin 2023. Ajo evidenton si risqet më të rëndësishme ndaj zhvillimit ekonomik inflacionin shumë të lartë, si dhe shtrëngimi i kushteve financiare, i cili mund të ulë konsumin e familjeve ashtu si dhe investimet në ekonomi.
Në raport banka këshillon për strategji fiskale të cilat duhet të kenë qëllim mbrojtjen e shtresave në nevojë. Ajo këshillon gjithashtu rritjen e bazës së taksapaguesve, përmirësimin e mbledhjes së të ardhurave buxhetore, si dhe pakësimin e parasë Cash në ekonomi. Me prioritet shihet nga BERZH adresimi i risqeve fiskale që vijnë nga kontratat e partneritetit publik privat dhe garancitë qeveritare ndaj kompanive shtetërore.
Një tjetër prioritet që duhet të ketë Shqipëria, sipas BERZH është përmirësimi i klimës së biznesit, duke nisur nga sistemi fiskal.
Lorenc Rabeta /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
