Çmimi mestar ditor i energjisë në tregun në avancë në Bursën Shqiptare të Energjisë u rrit me 11.8% në vitin 2024 në raport me vitin 2023.
Të dhënat zyrtare të publikuara nga ALPEX tregojnë se në vitin 2023, çmimi mesatar ishte 100.15 euro/MWh ndërsa në vitin 2024, ky çmim ishte 112.01 euro/MWh.
Shtrenjtimi i çmimit duket se lidhet drejtpërdrejt me sasinë më të pakët të energjisë të disponueshme në treg.
Të dhënat zyrtare të Bilancit të Energjisë publikuar nga INSTAT treguan se prodhimi neto vendas i energjisë elektrike, në vitin 2024, arriti vlerën 7.837 GWh nga 8.796 GWh energji të prodhuar në vitin 2023, duke shënuar rënie të prodhimit me 10,9%.
ALPEX përllogariti gjithashtu se çmimi maksimal ditor gjatë 2024 ishte 452 euro/MWh ndërsa ai minimal 21.61 euro/MWh.
Në total në Bursën Shqiptare të Energjisë u tregtua një volum total prej 1,172,580.58 MWh i energjisë elektrike u tregtua në Tregun e Ditës në Avancë.
Muaji me çmimin më të lartë mesatar mujor ishte nëntori me 180 euro/MWh dhe pas tij korriku, me 157.98 MWh.
Muaji me çmimin mesatar më të ulët ishte prilli me 61.04 MWh dhe maji me 70.21 euro/MWh.
Raporti vjetor i ALPEX tregoi se faturimet e kryera gjatë vitit të shkuar ishin dukshëm më të larta se një vit më parë duke arritur vlerën 301 milionë euro teksa në vitin 2023 kur bursa nisi aktivitetin e saj në prill faturimet u mbyllën me vlerën 167 milionë euro.
Në Vitin 2024, ALPEX mirëpriti 17 Anëtarë të rinj të Bursës në Tregun e Ditës në Avancë dhe 2 Anëtarë të rinj të Përgjithshëm Klerimi. Totali i Anëtarëve të Bursës: 36 Anëtarë Burse, dhe 4 Anëtarë të Përgjithshëm Klerimi./ N.Maho
Postimi ” Energji më e shtrenjtë, çmimi mesatar ditor në Bursë u rrit me 11.8% në vitin 2024 ” eshte marre nga Revista Monitor.
