Pavarësisht se Korporata Elektroenergjetike Shqiptare ka hapur një sërë procedurash për depozitimin apo shkëmbimin e energjisë elektrike, vetëm 1 prej tyre është finalizuar me sukses, ndërkohë që në tenderët e tjerë nuk është shfaqur asnjë interes. Sipas KESH, kjo situatë vjen nga një vendim qeverie që përcakton se depozitimi bëhet me koeficient 1:1, që do të thotë se nëse merret një MWh, atëherë duhet të kthehet po 1 MWh, si dhe pasiguria në tregje. “Në këtë kontekst, kjo është e leverdishme për depozituesin, por jo tregtarin”, – tha KESH në një përgigje me shkrim për TV .
“Depozitimi është praktikë që nuk përfshin shkëmbimin monetar, por tregtari apo shoqëria që do të depozitojë dhe do ta kthejë këtë energji në momentin e rënë dakord e sheh gjithmonë nga efekti financiar. Nëse ai e blen sot sasinë e nxjerrë nga KESH dhe e shet me një çmim X, ai duhet që, energjinë të cilën do ta kthejë në verë, ta sigurojë më lirë për të pasur interes në këtë procedurë. Por sot, në tregje ka shumë pasiguri dhe nuk ka më garanci që transaksioni që po kryen do të jetë i leverdishëm. Përveç kësaj, janë rritur kostot e kapaciteteve, të cilat edhe ato janë bërë të paqëndrueshme. Kjo e bën depozitimin një transaksion me risk të lartë”, – shtohej më tej në përgjigje.
Përgjatë vitit 2022 u realizua vetëm një kontratë depozitim-shkëmbimi, në datat 21-24 nëntor, në një sasi prej 1920 MWh në profilin 00-24 me koeficient 1.01. Marrja e depozitimit përcaktuar për datat 1-30 qershor 2023 në sasinë prej 1939 MWh. Ndërkohë që, një procedurë e hapur në muajin janar të këtij viti dështoi, pasi nuk pati asnjë interes.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
