Rritja e të ardhurave të kompanive që operojnë në tregun e energjisë elektirke gjatë vitit që shkoi do të pasohen me një rritje të ardhurash edhe për Entin Rregulltor të Energjisë. Ky dikaster synon të mbledhë rreth 326.4 mln lekë nga pagesat rregullatore për vitin 2023 nga subjektet e licencuar në sektorin e energjisë elektrike dhe gazit natyror.
Ndërkohë që, në raport me një vit më parë janë mbi 118 mln lekë të ardhura shtesë, duke qenë se vitin që shkoi kjo vlerë arrinte në 208 mln lekë. Tarifat për secilin subjekt janë përcaktuar përmes një vendimi të miratuar pak ditë më parë, teksa në total numërohen 341 të licencuar, të cilët janë të detyruar të bëjnë pagesat rregullatore.
Këto subjekte duhet të kryejnë pagesat ndaj ERE, jo më vonë se 30 ditë nga botimi në Fletoren Zyrtare i vendimit, pasi në të kundërt do të aplikohen penalitete. Më konkretisht, legjislacioni në fuqi përcakton ndëshkimin me gjobë deri në 3 për qind të të ardhurave të vitit paraardhës të të licencuarit,si dhe ka të drejtë të aplikojë një kamatëvonesë mbi vlerën e pagesës rregullatore, në masën e 0.2% të xhiros ditore për çdo ditë vonesë në pagesën e saj.
Ndërkaq, ky është viti i katërt, ku aplikohen pagesa rregullatore fikse prej 100 mijë lekësh për shoqëritë e licencuara në aktivitetin e prodhimit të energjisë elektrike, furnizimit dhe tregtimit të energjisë elektrike dhe gazit natyror që në vitin parardhës nuk kanë pasur aktivitet.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
