Kancelari Friedrich Merz synon të rigjallërojë ekonominë dhe të përballet me sfidat e mungesës së fuqisë punëtore.
Gjermanët që zgjedhin të vazhdojnë punën pas moshës së pensionit do të mund të fitojnë deri në 2,000 euro në muaj pa paguar taksa, në kuadër të nismës së kancelarit Friedrich Merz për të luftuar mungesën e fuqisë punëtore dhe për të ringjallur ekonominë më të madhe të Europës.
Sipas projektligjit, qeveria vlerëson se masa do t’i kushtojë buxhetit rreth 890 milionë euro në vit, duke filluar nga 1 janari 2025. E ashtuquajtura “skemë e pensionit aktiv” është një nga zotimet kryesore të fushatës së Merz dhe pritet të miratohet nga koalicioni i tij me socialdemokratët të mërkurën.
Koalicioni synon të zbusë efektet e plakjes së popullsisë gjermane, teksa ekonomia përballet me mungesë të punonjësve të kualifikuar pas tre vitesh stanjacioni. Kjo iniciativë është një nga ndryshimet strukturore që qeveria e quan pjesë të “vjeshtës së reformave” të shpallura nga kancelari.
“Tregu i punës në Gjermani po përballet me sfida strukturore për shkak të ndryshimeve demografike. Brezi i të lindurve në vitet 1945 – 1965 po dalin gradualisht në pension, ndërsa më pak të rinj po hyjnë në tregun e punës. Kjo po çon në mungesë punonjësish të kualifikuar në shumë sektorë,” thuhet në projektligj.
Punësimi pas moshës së pensionit është i lejuar në Gjermani, ashtu si në shumicën e vendeve të Europës, por Berlini dëshiron ta bëjë më tërheqës përmes lehtësive tatimore.
Shembuj të ngjashëm janë vërejtur në Greqi, ku pas lejimit të punësimit të pensionistëve pa humbur pensionin dhe me një tatim të reduktuar prej 10% mbi të ardhurat shtesë, numri i tyre u rrit nga 35,000 në vitin 2023 në mbi 250,000 deri në shtator 2024, sipas Ministrisë greke të Punës.
Gjermania përballet me disa nga sfidat më të mëdha demografike në Europë: 4.8 milionë punonjës, rreth 9% e forcës së punës, pritet të dalin në pension deri në vitin 2035, duke ushtruar presion mbi sistemin e mirëqenies dhe ekonominë.
Përveç tkurrjes së fuqisë punëtore, Gjermania ka edhe orët mesatare më të ulëta të punës ndër ekonomitë e OECD-së, sipas organizatës me qendër në Paris. Ndërkohë, puna me kohë të pjesshme është më shumë se dyfishuar që nga fillimi i viteve ’90, duke arritur në 30% të forcës së punës, kryesisht për shkak të pjesëmarrjes së lartë të grave.
Sipas projektligjit, nisma synon të ndihmojë “ruajtjen e eksperiencës dhe dijes në kompani për një periudhë më të gjatë”, duke çuar në një rritje të përgjithshme të punësimit, si dhe në rritje ekonomike e të ardhura shtesë për shtetin.
Si punonjësit ashtu edhe punëdhënësit do të paguajnë kontribute sociale mbi këto paga, duke i dhënë një shtysë financave të tensionuara të sistemit gjerman të sigurimeve shoqërore dhe pensioneve.
Vlerësimi prej 890 milionë eurosh në humbje të të ardhurave nga tatimet shihet si kufiri i ulët i parashikimeve; disa ekonomistë mendojnë se ndikimi real do të jetë më i madh. Instituti IW vlerëson se kostoja vjetore mund të arrijë 1.4 miliardë euro, me rreth 340,000 punonjës që mund të përfitojnë nga lehtësia fiskale.
Megjithatë, qeveria po mban në fuqi edhe stimujt ekzistues që nxisin daljen e hershme në pension që në moshën 63 vjeç. Mosha ligjore e daljes në pension në Gjermani është 67 vjeç.
Numri i përfituesve nga skema e re pritet të rritet me kalimin e kohës, tha Holger Schmieding, kryeekonomist në Berenberg Bank, duke shtuar se efektet pozitive në rritje dhe kontributet sociale “do të kompensojnë kostot brenda dy ose tre vjetësh”.
“Ajo përçon gjithashtu një mesazh pozitiv, duke treguar se shoqëria vlerëson kontributin e njerëzve më të moshuar që zgjedhin të vazhdojnë punën,” shtoi ai, “duke krijuar edhe një efekt psikologjik të dobishëm me kalimin e kohës.” / FT
Postimi ” Gjermania do të lejojë pensionistët të fitojnë deri në 2,000 euro në muaj pa taksa ” eshte marre nga Revista Monitor.
