Në një vendim të madh që forcon përpjekjet e Bashkimit Europian për të shtypur kompanitë më të mëdha të teknologjisë në botë, Google humbi një apel të mërkurën për të rrëzuar një vendim historik antitrust nga rregullatorët europianë kundër gjigantit të teknologjisë.
Vendimi i Gjykatës së Përgjithshme me seli në Luksemburg lidhet me një vendim të vitit 2017 nga Komisioni Europian, për të gjobitur Google me 2.4 miliardë euro (rreth 2.8 miliardë dollarë) për dhënien e trajtimit preferencial ndaj shërbimit të tij të krahasimit të çmimit ndaj shërbimeve të njëjta të kompanive rivale.
Dënimi ishte i pari nga tre të tilla të lëshuara nga Margrethe Vestager, nënpunësja më e lartë e antitrustit e Komisionit Europian, kundër Google. Dhe me rastet e tjera që po apelohen gjithashtu – dhe hetime shtesë etë autoriteteve uropiane që po zhvillohen kundër Amazon, Apple dhe Facebook – çështja është parë nga afër si një sinjal i pikëpamjes së gjykatës për përdorimin agresiv të ligjit antitrust nga Komisioni Europian kundër gjigantëve të teknologjisë amerikane. Por Google mund të apelojë vendimin në gjykatën më të lartë të Bashkimit Europian, në Gjykatën Europiane të Drejtësisë.
Pavaarësisht mbështetjes në rritje për rregullimin e platformave të mëdha teknologjike në Shtetet e Bashkuara të Amerikës dhe në Bashkimin Europian, gjykatat pritet të luajnë një rol thelbësor në përcaktimin se sa larg do të jenë në gjendje të shkojnë qeveritë kur ndërhyjnë në ekonominë dixhitale. Në SHBA, Google po përballet me një padi të Departamentit të Drejtësisë për sjellje antikonkurruese dhe Facebook po përballet me një tjetër nga Komisioni Federal i Tregtisë.
Në Europë, gjykatat shpeshherë kanë vendosur kundër rregullatorëve. Vitin e kaluar, Gjykata e Përgjithshme vendosi kundër një urdhri për t’i kërkuar Apple të paguajë 13 miliardë euro taksa të papaguara. Amazon gjithashtu apeloi me sukses një urdhër tjetër për të shlyer taksat.
Të mërkurën, gjykata mbajti anën e rregullatorëve të cilët në vitin 2017 thanë se gjigandi i internetit përdori dominimin e tij si një motor kërkimi për të ndihmuar në mënyrë të padrejtë shërbimin e tij të blerjeve në internet ndaj atyre të rivalëve më të vegjël.
“Duke favorizuar shërbimin e tij të krahasimit të çmimeve të blerjeve në faqet e tij të rezultateve të përgjithshme të kërkimit përmes shfaqjes dhe pozicionimit më të favorshëm, ndërkohë që shmangte rezultatet nga shërbimet konkurruese të krahasimit në ato faqe me anë të algoritmeve të renditjes – kështu Google zhduku konkurrencën bazuar në meritave.” tha gjykata.
Google tha se ishte duke e shqyrtuar vendimin, por shtoi se tashmë ka bërë një sërë ndryshimesh në produktin e saj të krahasimit të çmimit të blerjeve për të përmbushur vendimin e vitit 2017.
“Reklamat kanë ndihmuar gjithmonë njerëzit të gjejnë produktet që kërkojnë shpejt dhe me lehtësi, dhe kanë ndihmuar tregtarët të arrijnë klientët e mundshëm”, tha kompania në një deklaratë. “Qasja jonë ka funksionuar me sukses për më shumë se tre vjet, duke gjeneruar miliarda klikime për më shumë se 700 shërbime krahasimi të blerjeve.”
Gjoba prej 2.4 miliardë euro ishte një rekord në atë kohë, përpara se të tejkalohej në vitin 2018, kur komisioni gjobiti po Google me 4.34 miliardë euro për përdorimin e paligjshëm të sistemit operativ Android për të forcuar përdorimin e motorit të tij të kërkimit dhe shërbimeve të tjera në pajisjet celulare.
Në vitin 2019, zyra e zonjës Vestager gjobiti sërisht Google me 1.49 miliardë euro për vendosjen e kushteve të padrejta ndaj kompanive që përdorën modulin e saj të kërkimit në faqet e tyre të internetit në Europë.
Hetimet ndaj Google ndihmuan në frymëzimin e rregullave të reja më të ashpra të konkurrencës që po hartohen në Bashkimin Europian që synojnë platformat më të mëdha të teknologjisë në botë. Projektligji – Akti i Tregjeve Dixhitale – pritet të miratohet vitin e ardhshëm dhe do t’u japë rregullatorëve europianë kompetenca të reja për të ndërhyrë në ekonominë dixhitale, duke përfshirë bllokimin e kompanive si Google dhe Apple nga dhënia e shërbimeve të tyre një trajtim preferencial ndaj rivalëve. Shkelja e rregullave të reja do të rezultonte me gjoba deri në 10 për qind të të ardhurave vjetore të një kompanie.
Konkurrentët e Google e mirëpritën vendimin e së mërkurës, por shumë thanë se hetimet dhe seancat gjyqësore kishin zgjatur aq shumë sa Google ishte në gjendje të forconte më tej pozitën e saj dominuese.
“Ndërsa ne mirëpresim gjykimin e sotëm, ai nuk e zhbën dëmin e konsiderueshëm ndaj konsumatorit dhe kundër konkurrencës të shkaktuar nga më shumë se një dekadë e praktikave tinzare të manipulimit të kërkimit të Google,” tha për New York Times Shivaun Raff, shefi ekzekutiv dhe bashkëthemeluesi i Foundem, një platformë krahasimi çmimesh për blerje elektronike, kompani kjo me qendër në Europë që ndihmoi në formulimin e akuzës fillestare ndaj Google.
