Nga sot të gjithë fermerët që kanë NIPT apo grupe fermerësh mund të aplikojnë për të përfituar nga masat e reja të skemës kombëtare të investimeve në bujqësi.
Ministrja e Bujqësisë dhe Zhvillimit Rural, Anila Denaj, nëpërmjet një video të shpërndarë në rrjetet e saj sociale, ftoi fermerët të cilët plotësojnë kushtet e përcaktuara, të aplikojnë për të përfituar nga kjo skemë.
Sipas Denajt për investimet në ndërtimin e serrave diellore, në rritjen e mekanikës bujqësore, në rrjetat antibreshër, në nxitjen dhe zhvillimin e akuakulturës detare dhe në stabilimentet e mbarështimit të kafshëve dhe shpendëve mundësohet fondi prej 1.5 mld lekësh në formën e një granti për 50% të vlerës së investimit.
“Të gjithë fermerët, të cilët kanë një nipt fermeri, shoqëritë tregtare, të cilat janë të angazhuara në këtë sektor dhe shoqëritë e bashkimit bujqësor janë të lutur, që duke filluar që nga dita e sotme të bëjnë aplikimet e tyre.
Skema do të jetë përgjatë 5 javëve e hapur për të gjithë përfituesit nga veriu në jug nga lindja në perëndim dhe për këtë ne do të nisim një komunikim të drejtpërdrejt intensiv në 12 qarqet e vendit.
Ndërkohë, pikat agro janë aty për të dhënë të gjitha shpjegimet e duhura për të gjithë pyetjet e fermerëve, të cilët jam e bindur, që janë duke e pritur këtë Skemë Kombëtare, pasi kemi diskutuar dhe punuar së bashku përgjatë gjithë vitit.
Është një Skemë Kombëtare, që vijon skemën e fillimit të vitit, të subvencioneve të drejtpërdrejta dhe kështu kompleton një cikël të mbështetjes financiare, që Qeveria Shqiptare ka dhënë dhe jep për një sektor shumë të rëndësishëm, i cili jo vetëm angazhon një numër të konsiderueshëm punonjësish, por mbi të gjitha është një motor i zhvillimit të ekonomisë tuaj familjare, ekonomisë së përgjithshme shqiptare dhe na bën krenar sot në 80 tregje elitare”, u shpreh Denaj.
Më herët hynë në fuqi ndryshimet e skema kombëtare e mbështetjes në bujqësi 2024. Skemës kombëtare iu shtuan edhe 5 masa të reja për mbështetjen me financime për ngritjen e serave diellore, për ngritjen e serave mbrojtëse të prodhimit nga breshëri apo ngritje stallash dhe stabilimente për rritjen e shpendëve.
Konkretisht masa e parë do të mbështesë fermerët që do të ndërtojnë serra diellore të reja me sipërfaqe nga 0,2 ha deri në 2 ha për rritjen e perimeve, rrushit dhe luleshtrydheve. Konkretisht masa e përfitimit për serrat e prodhimit të perimeve do të jetë deri në 15 mln lekë për ha. Për serrat e prodhimit të rrushit për tavolinë masa e përfitimit do të jetë 8 milionë lekë për ha dhe për serrat e prodhimit të luleshtrydheve 4 mln lekë për ha.
Masa e dytë parashikon dhënien e përfitimit për ngritjen e rrjetave për mbrojtjen e prodhimit nga breshëri në blloqet ekzistuese me pemë frutore, agrume dhe vreshta. Masa e përfitimit do të jetë 50% e vlerës totale të investimit, por jo më shumë se 1,5 mln lekë për ha.
Masa e tretë përfshin dhënie fondesh për investime në ngritjen e stallave për kafshët dhe stabilimente shpendësh me sipërfaqe nga 1 deri në 5 ha. Për ndërtimin e ambienteve për mbarështimin e kafshëve dhe stabilimenteve për rritjen e shpendëve, me kapacitet jo më pak se 10 lopë, jo më pak se 100 të imëta, jo më pak se 10 dosa dhe jo më pak se 10,000 shpendë. Masa e përfitimit do të jetë 50% e vlerës totale të faturave tatimore, por jo më shumë 15 mln lekë për subjekt.
Masa e katërt shtesë do të jetë në funksion të mekanizimit të bujqësisë. Për blerje makinerish dhe traktorësh financimi do të jetë deri në 5 mln lekë për subjekt.
Masa e pestë shtesë është në mbështetje të akuakulturës. Për koshat e rritjes së peshkut sasa e përfitimit do të jetë 50% e vlerës totale të faturave tatimore, por jo më shumë se 20 mln lekë për subjekt.
Në total fondi i akorduar për zbatimin e këtyre masave shtesë është parashikuar 1,5 mld lekë për periudhën 2024 deri në 2027. Për vitin 2024 janë parashikuar të akordohen 500 mln lekë. Ndërsa diferencat eventuale të papërdorura nga fondi prej 500 mln lekësh, për vitin 2024, mund të alokohen për masat mbështetëse, të përcaktuara në pikat 2.1 dhe 2.2, të këtij vendimi.
Postimi ” Hapen aplikimet për masat e reja, Denaj: 1,5 mld lekë fonde për investime në bujqësi ” eshte marre nga Revista Monitor.
