Kristi Ceta/
Huawei Technologies e Kinës zbuloi telefonin e parë në botë të palosshëm deri në 3 herë, teksa kërkon të zgjerojë udhëheqjen në tregun më të madh në botë dhe të vjedhë vëmendjen nga Apple, pas prezantimit të iPhone-it të ri.
Gjiganti kinez i teknologjisë tregoi Mate XT-në e tij të re, të cilin përdoruesit mund ta palosin tre herë, gjatë një ceremonie prezantimi në qendrën e teknologjisë jugore të Shenzhen.
Pajisja ka marrë tashmë më shumë se 3.6 milionë paraporositje, për të cilat nuk kërkohet asnjë depozitë, sipas faqes së internetit të kompanisë. I gjithë tregu global për telefonat e palosshëm ishte rreth 4 milionë njësi në tremujorin e dytë, sipas firmës kërkimore IDC.
Mate XT vjen me ngjyrë të kuqe e të zezë dhe ka një ekran 10.2 inç. Me gjerësi 3.6 mm, kompania tha se ishte telefoni më i hollë i palosshëm në botë.
Lançimi, i cili pason një seri debutimesh të suksesshme të smartfonëve, forcon pozicionin kundër Apple në Kinë, ku disa konsumatorë kritikuan iPhone 16 të ri për mungesën e veçorive të inteligjencës artificiale në vend.
Apple nuk ka shpallur ende një partner të këtyre veçorive në Kinë për telefonin e ri, ndërsa Apple Intelligence, softueri AI i kompanisë, do të jetë i disponueshëm në gjuhët kineze vetëm vitin e ardhshëm.
Por me një çmim që fillon nga 2,808 dollarë, më shumë se dyfishi i çmimit fillestar të iPhone 16 Pro Max, dhe prodhim të kufizuar, telefoni “tri-fold” ka të ngjarë të bëhet më shumë një simbol i aftësive teknologjike të Huawei sesa një shtytës i madh i shitjeve, thanë analistët.
Tregu i telefonave të palosshëm u rrit 57% nga viti në vit në tremujorin e dytë me 3.9 milionë njësi të dërguara, kryesisht pasi prodhuesit kinezë u zgjeruan në tregjet jashtë shtetit. Huawei u rendit si shitësi më i madh në botë i smartfonëve të palosshëm në tre muajt e dytë me 27.5% të tregut, përpara Samsung Electronics të Koresë së Jugut, me 16.4%.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
