Flet Ana Murati, drejtoresha ekzekutive e Myticket.al.
“Shqipëria ka potencial të jashtëzakonshëm për t’u shndërruar në një destinacion kryesor për evente dhe koncerte ndërkombëtare” thekson Ana Murati, drejtoresha ekzekutive e Myticket.al.
Në këtë intervistë, znj. Murati ofron një vështrim të thellë mbi rritjen dhe evolucionin e industrisë së eventeve në Shqipëri, duke nënvizuar rolin e teknologjisë dhe bashkëpunimit midis sektorit publik dhe privat për të realizuar këtë potencial.
Ajo gjithashtu diskuton sfidat dhe trendet aktuale, duke ilustruar se si Shqipëria po ndihmon në përmirësimin e përvojës së turistëve dhe po tërheq më shumë vëmendjen ndërkombëtare.
Si e shihni të ardhmen e eventeve dhe koncerteve në Shqipëri? A ka potencial për zhvillim të mëtejshëm të kësaj industrie?
E ardhmja e organizimit të eventeve dhe koncerteve në Shqipëri duket shumë premtuese. Shqipëria ka potencial të madh për zhvillim në industrinë e eventeve dhe koncerteve. Vendi ka peizazhe natyrore të bukura, kulturë të pasur dhe historike, që e bëjnë atë një destinacion tërheqës për organizimin e eventeve.
Rritja e interesit global dhe turizmi gjithashtu krijojnë mundësi për organizimin e ngjarjeve ndërkombëtare. Teknologjia, përfshirë platformat e shitjes së biletave si myticket.al, ndihmon në zgjerimin e audiencës dhe ofrimin e një përvoje më të mirë për përdoruesit.
Sa i rëndësishëm është bashkëpunimi midis institucioneve publike dhe sektorit privat në organizimin e këtyre eventeve?
Bashkëpunimi midis institucioneve publike dhe sektorit privat është shumë i rëndësishëm për organizimin e suksesshëm të eventeve.
Kjo mbështetje mund të ofrojë lehtësi administrative, financime dhe burime që do të ndihmojnë në organizimin e eventeve më të mëdha dhe më cilësore.
Partneriteti efektiv ndihmon gjithashtu në promovimin e vendit dhe rritjen e imazhit të tij në nivele ndërkmombëtare.
A ka sfida specifike gjatë sezonit turistik? Si po i adresojnë këto sfida?
Gjatë sezonit turistik, përballemi me sfida si trafiku dhe akomodimi. Organizatorët e eventeve duket se po planifikojnë dhe të ofrojnë mundësi alternative për të zbutur këto probleme, siç janë organizimi i eventeve në periudha më pak të ngarkuara ose ofrimi i paketave speciale për kategori të ndryshme pjesëmarrësish.
Si ndikojnë eventet dhe koncertet në përvojën e përgjithshme të turistëve në Shqipëri? A ka ndonjë trend për të ofruar përvoja më të personalizuara?
Eventet dhe koncertet ndihmojnë në përmirësimin e përvojës së përgjithshme të turistëve, duke ofruar mundësi për t’u angazhuar me kulturën lokale dhe për të krijuar eksperienca të veçanta.
Po ashtu, ka një trend në rritje për të ofruar përvoja më të personalizuara, me organizatorë që krijojnë ngjarje që lidhen me interesat specifike të pjesëmarrësve të tyre.
Si kanë evoluar eventet dhe koncertet gjatë sezonit turistik në vitet e fundit? A po shihni ndonjë ndryshim në llojin e eventeve që po organizohen?
Eventet në Shqipëri janë bërë më të larmishme dhe kanë përfshirë më shumë aktivitete, si festivale muzikore, artesh dhe ngjarje kulturore.
Ka një rritje të organizimit të eventeve ndërkombëtare që tërheqin vëmendjen dhe pjesëmarrësit nga e gjithë bota, duke e bërë Shqipërinë një destinacion më tërheqës.
A mund të ndani disa nga sukseset më të mëdha që keni vërejtur në këtë sektor gjatë viteve të fundit?
Disa nga sukseset më të mëdha përfshijnë rritjen e festivaleve muzikore si “Porto Palermo Festival”, “Sunny Hill Festival” etj., që kanë sjellë artistë të njohur ndërkombëtarë dhe kanë tërhequr turistë nga e gjithë bota.
Këto ngjarje kanë ndihmuar në promovimin e Shqipërisë si një destinacion kulturor dhe turistik në rritje.
Në përgjithësi, industria e eventeve dhe koncerteve në Shqipëri po rritet dhe po evoluon, duke ofruar mundësi të shkëlqyera për zhvillimin e mëtejshëm.
Postimi ” Industria e eventeve dhe koncerteve në Shqipëri po rritet dhe po evoluon ” eshte marre nga Revista Monitor.
