Flet Ilda Baraj, administratore e KID-ALB
Industria e tullave parashikon që viti 2025 do të jetë jo fort i lehtë, e dyzuar mes ndikimeve pozitive që mund të sjellë fakti që jemi në një vit elektoral dhe efekteve negative të zhvlerësimit të Euros, që ka dhënë ndikim tek importet e larta.
Ilda Baraj, administratore e KID-ALB, shprehet se viti 2024 pati zhvillime negative për industrinë, ku së pari sektori i ndërtimit nuk ka qenë në trendin e zakonshëm të viteve të mëparshme.
Së dyti, edhe Programi i Rindërtimit kishte një nivel shpenzimi më të ulët.
Së treti, zhvlerësimi i Euros ka rritur importet nga vendet ballkanike. Për rrjedhojë ka një rënie të prodhimit, por edhe të shitjeve në sektorin e tullave në vend.
Si ka qenë viti 2024 në tërësi për industrinë e tullave në këndvështrimin tuaj duke pasur parasysh prodhimin dhe shitjet?
Prodhimi ka pasur një rënie prej 17%, për faktin se ndërtimi në tërësi ka qenë në një nivel më të ulët krahasuar me vitet e tjera. Kjo shpjegohet me uljen e nivelit të ndërtimit për Rindërtim, i cili pati ndikim domethënës.
Në vitin 2023 ka qenë me vlerën 1.3 milionë euro dhe për 11-mujorin e vitit 2024 është 334 mijë euro.
Shitjet në volum kanë qenë në një raport prej 25% më të ulëta krahasuar me të njëjtën periudhë të vitit të kaluar. Shitjet në volum janë ulur me 15% nga efekti i çmimit 10%.
Shkaku kryesor është konkurrenca dhe rritja e importit të materialeve të ndërtimit nga vendet ballkanike, si pasojë edhe e zhvlerësimit të monedhës Euro.
Cilat janë disa nga sfidat kryesore me të cilat po përballet kjo industri në lidhje me kostot dhe punësimin?
Mungesa e fuqisë punëtore është kthyer në një shqetësim kryesor të klimës së biznesit pothuajse në të gjithë sektorët e ekonomisë duke prekur ndjeshëm edhe industrinë tonë.
Mungesa e aftësive profesionale është gjithashtu një pengesë në këtë industri duke na orientuar drejt rekrutimit të punonjësve të huaj, që gjithashtu nuk plotësojnë kriteret e kërkuara, por duhet të marrin patjetër trajnimin dhe specializimin e duhur.
Problem mbetet stabilizimi i çmimit të lëndëve të para të siguruara nga prodhimi vendas, si lënda drusore dhe materialet e tjera ndihmëse, si dhe çmimet e lëndëve të para dhe ndihmëse të siguruara nga importi (material ambalazhi e pjesë të ndryshme këmbimi).
Ndërtimi duket se ka qenë sërish në lulëzim edhe këtë vit. A është reflektuar kjo në të njëjtën situatë edhe për sektorin tuaj? Si është kërkesa?
Edhe pse ndërtimi është në parametrat e viteve të tjera, kërkesa për produktet tona është në ulje për shkak të përparimit teknologjik në sektorin e ndërtimit dhe rritjen e konkurrencës nga vendet importuese të materialeve të ndërtimit (Kosovë dhe Maqedoni e Veriut).
Si paraqitet situata me eksportet këtë vit dhe a janë kompanitë shqiptare me çmime konkurruese në raport me rajonin?
Eksportet kanë qenë në nivel të qëndrueshëm drejt Malit të Zi dhe Italisë. Rënia në vlerë ka ardhur për shkak të ndikimit të zhvlerësimit të monedhës Euro.
Si e parashikoni ecurinë e sektorit në vitin 2025 në lidhje me prodhimin, shitjet dhe kostot? A mendoni se do të jetë një vit më i mirë se 2024, duke pasur parasysh që është një vit elektoral?
Besojmë shumë në ecurinë pozitive duke qenë një vit elektoral. Por jemi pesimistë në konkurrencën nga subjektet importuese, të cilat operojnë me një çmim të barabartë me koston e prodhimit tonë./ N.Maho
Postimi ” “Industria e tullave, mes pritshmërive pozitive nga zgjedhjet dhe ndikimit negativ të Euro” ” eshte marre nga Revista Monitor.
