Inflacioni bazë pësoi një rënie të lehtë në muajin gusht, duke ndalur një cikël rritjeje për pesë muaj radhazi. Sipas të dhënave nga Banka e Shqipërisë, inflacioni bazë ra në 2.84%, nga 2.91% që kishte qenë për korrikun.
Megjithatë, inflacioni bazë vazhdon të jetë rritje krahasuar me të njëjtën periudhë të një viti më parë, kur kishte qenë në nivelin 2.37%
Nënshporta që mat inflacionin bazë është zgjeruar lehtësisht me rishikimin e peshave në vitin 2025, në 69.6% të totalit të shportës së IÇK-së, nga 69% në vitin 2024.
Inflacioni bazë përjashton kryesisht ato produkte që kanë luhatshmëri të lartë, produktet ushqimore dhe ato energjetike dhe ka si qëllim kryesor ta zhveshë rritjen e përgjithshme të çmimeve nga luhatjet me natyrë më afatshkurtër.
Paralelisht me inflacionin bazë, edhe inflacioni bazë neto për gushtin ra lehtë në 2.99%, nga 3.04% që kishte qenë për korrikun, por ngelet në rritje krahasuar me nivelin prej 2.26% të një viti më parë.
Inflacioni bazë neto përjashton më tej nga inflacioni edhe nëngrupet e ushqimeve të përpunuara (përfshirë bukën dhe drithërat) dhe matet mbi 44.6% të shoqërisë së IÇK-së.
Ndërkohë, inflacioni që përjashton të gjitha produktet ushqimore dhe energjetike për muajin gusht zbriti në 2.94%, nga 2.94% që kishte qenë në muajin korrik.
Sipas INSTAT, inflacioni total në ekonomi, i matur për të gjithë shportën e mallrave dhe shërbimeve të konsumit për gushtin ra lehtë në 2.3%, nga 2.4% që kishte qenë për muajin korrik, por në rritje nga niveli prej 2% që kishte qenë një vit më parë.
Inflacioni vazhdon të jetë poshtë objektivin prej 3%, i ndikuar nga rënia e inflacionit nga jashtë, mbiçmimi i kursit të këmbimit dhe goditjet e përsëritura të ofertës. Por, nga ana tjetër inflacioni bazë dhe presionet e brendshme inflacioniste mbeten të larta dhe mbizotëruese në formimin e inflacionit total. Sipas Bankës së Shqipërisë, kjo sugjeron se aktiviteti ekonomik është pranë potencialit.
Në raportin e politikës monetare për tremujorin e tretë të vitit, Banka e Shqipërisë parashikonte që inflacioni do të kthehet pranë objektivit prej 3% brenda gjysmës së parë të vitit të ardhshëm. Megjithatë, Banka Qendrore theksoi edhe njëherë se perspektiva e zhvillimeve ekonomike rrethohet nga pasiguri të shtuara, të cilat burojnë kryesisht nga tensionet gjeopolitike dhe tensionet e rritura ekonomike e tregtare në ambientin e huaj./ E.Shehu
Burimi: BSH
Postimi ” Inflacioni bazë frenoi në gusht, pas pesë muajsh radhazi në rritje ” eshte marre nga Revista Monitor.
