Inflacioni në Eurozonë u rrit në 2.1% në Gusht, pak mbi pritshmëritë, por ende pranë objektivit të BQE-së. Inflacioni bazë mbeti në 2.3%.
Inflacioni në Eurozonë shënoi një rritje të lehtë në Gusht, duke tejkaluar pritshmëritë, por mbeti mjaftueshëm pranë objektivit 2% të Bankës Qendrore Europiane (BQE), për të mos shkaktuar shqetësim serioz — të paktën për momentin.
Sipas vlerësimit paraprak më të fundit nga Eurostat, inflacioni vjetor në zonën euro u ngjit në 2.1% në Gusht, nga 2.0% që ishte në Korrik. Ekonomistët kishin parashikuar që norma të mbetej e pandryshuar.
Në baza mujore, çmimet u rritën me 0.2%, duke reflektuar një rikthim pas një periudhe të sheshtë muajin e kaluar.
Ndërkohë, inflacioni bazë — që përjashton energjinë, ushqimin, alkoolin dhe duhanin — mbeti i pandryshuar në 2.3% për të katërtin muaj radhazi. Kjo tregon se presionet e brendshme mbi çmimet vazhdojnë të jenë të qëndrueshme, por jo në një nivel që do të ndizte alarmin për BQE-në.
Inflacioni i shërbimeve zbutet lehtë
Duke parë përbërësit kryesorë, çmimet e ushqimeve, alkoolit dhe duhanit u rritën me 3.2% në bazë vjetore, nga 3.3% në Korrik, ndërsa inflacioni i shërbimeve u zbut lehtë në 3.1%.
Ndërkohë, çmimet e mallrave industriale (përjashtuar energjinë) mbetën të pandryshuara në 0.8%, ndërsa çmimet e energjisë vijuan rënien, megjithëse me ritëm më të ngadaltë, duke rënë me 1.9% krahasuar me 2.4% në Korrik.
Mes vendeve të Eurozonës, diferencat mbeten të mëdha. Estonia regjistroi inflacionin më të lartë vjetor me 6.2%, e ndjekur nga Kroacia me 4.6%, ndërsa Franca dhe Qipro shënuan normat më të ulëta përkatësisht me 0.8% dhe -0.1%.
Në bazë mujore, Belgjika u veçua me një rritje çmimesh prej 1.5%. Në të kundërt, disa vende përjetuan deflacion: Greqia shënoi një rënie prej 0.6%, Lituania dhe Finlanda ranë me 0.3%, Letonia dhe Italia me 0.2%, ndërsa Portugalia u ul me 0.1%.
Si do të veprojë BQE?
Banka Qendrore Europiane u mblodh për herë të fundit në Korrik, kur vendosi të ndalojë uljet e normave të interesit pas tetë reduktimeve radhazi.
Presidentja Christine Lagarde deklaroi se BQE-ja ishte “në një pozicion të mirë”, por mbajti gjithashtu një ton të kujdesshëm, duke theksuar pasiguritë që lidhen me politikat tregtare dhe zinxhirët globalë të furnizimit.
Me inflacionin që po ndjek një tendencë të qëndrueshme pranë objektivit të BQE-së dhe me normën e papunësisë në Eurozonë që mbetet në minimumin historik prej 6.2%, tregjet nuk presin ndonjë ndryshim të normave të interesit në mbledhjen e ardhshme të Këshillit Drejtues më 10 Shtator.
Norma e depozitës pritet të mbetet në 2%, ndërsa BQE-ja vijon qëndrimin e saj pritës dhe vëzhgues./ Euronews
Postimi ” Inflacioni në Eurozonë tejkalon pritshmëritë në Gusht, si do të veprojë BQE? ” eshte marre nga Revista Monitor.
