Çmimet e konsumit në SHBA u rritën më pak se sa pritshmëritë në shkurt, por përmirësimi ka të ngjarë të jetë i përkohshëm, në sfondin e tarifave agresive për importet, që pritet të rrisin kostot e shumicës së mallrave në muajt në vijim.
Indeksi i çmimeve të konsumit (CPI) u rrit 0.2% muajin e kaluar, pas rritjes 0.5% në janar, tha Byroja e Statistikave të Punës të Departamentit të Punës.
Në 12 muajt deri në shkurt, CPI u rrit me 2.8% dhe 3.0% në janar. Ekonomistët e anketuar nga Reuters kishin parashikuar që CPI të rritej me 0.3% dhe të arrinte 2.9% në vit.
Raporti i parë i inflacionit të administratës së Presidentit Donald Trump, i la çmimet në nivele që ekonomistët thonë se nuk janë në përputhje me objektivin e Rezervës Federale 2%. Trump në fillim të këtij muaji shkaktoi një luftë tregtare, duke rritur tarifat për mallrat nga Kina në 20% dhe duke vendosur një tarifë të re prej 25% për importet kanadeze dhe meksikane, përpara se të telefononte dhe të jepte një përjashtim një muaj për çdo mall, që përmbush rregullat e origjinës sipas Marrëveshjes SHBA-Meksikë-Kanada për tregtinë.
Tarifat e rritura të çelikut dhe aluminit hynë në fuqi këtë javë, duke shkaktuar hakmarrje të shpejtë nga Europa.
Konsumatorët, të frikësuar nga çmimet më të larta, ka të ngjarë të nxitojnë të blejnë mallra si automjete dhe sende të tjera.
Ndërkohë, pritshmëritë e konsumatorëve për inflacionin u rritën në shkurt.
“Sa më gjatë që inflacioni të jetë mbi objektivin e Fed, edhe nëse është për shkak të forcave të përkohshme si tarifat, aq më e madhe është mundësia që pritshmëritë të drejtohen për lart,” tha Stephen Juneau, ekonomist amerikan në Bank of America Securities. “Po të ndodhte kjo, rivendosja e stabilitetit të çmimeve do të ishte shumë më e vështirë për Fed.”
Duke përjashtuar komponentët e paqëndrueshëm të ushqimit dhe energjisë, CPI u rrit me 0.2% në shkurt, pas rritjes 0.4% në janar. Në 12 muaj deri në shkurt, i ashtuquajturi CPI bazë u rrit me 3.1% pas rritjes me 3.3% në janar.
Pas kaskadës së tarifave, ekonomistët kanë përmirësuar parashikimet e tyre për inflacionin.
Goldman Sachs vlerëson se Indeksi kryesor i Çmimeve të Shpenzimeve të Konsumit Personal, një nga masat e ndjekura nga Fed për politikën monetare, do të rritet nga 2.65% në janar në rreth 3% deri në dhjetor. Ishte parashikuar, që inflacioni bazë vjetor i PCE të mbetej në zonën e mesme prej 2% për pjesën tjetër të vitit.
Banka qendrore e SHBA-së pritet të mbajë të pandryshuar normën bazë të interesit njëditor në intervalin 4.25%-4.50% të mërkurën e ardhshme. Tregjet financiare presin, që Fed të rifillojë uljen e normave në qershor, për shkak të përkeqësimit të perspektivës ekonomike, pas ndalimit në janar.
Norma e politikës është ulur me 100 pikë bazë që nga shtatori, kur Fed filloi ciklin e saj të lehtësimit. Banka qendrore e rriti normën bazë me 5.25 pikë përqindjeje në 2022 dhe 2023 për të zbutur inflacionin. / Reuters
Postimi ” Inflacioni në SHBA bie më shumë se pritshmëritë në 2.8% ” eshte marre nga Revista Monitor.
