Inflacioni në SHBA ra në 2.5% në gusht, duke krijuar kushtet, që Rezerva Federale të fillojë të ulë normat e interesit në mbledhjen e javës së ardhshme.
Indeksi i fundit vjetor i çmimeve të konsumit (CPI), krahasuar me ritmin 2.9% të korrikut, ishte pak më poshtë vlerësimit prej 2.6% nga ekonomistët e anketuar nga Reuters.
CPI bazë, i cili përjashton çmimet e paqëndrueshme të ushqimit dhe energjisë, ishte i qëndrueshëm, në 3.2%, sipas të dhënave të publikuara nga Byroja e Statistikave të Punës.
Të dhënat e inflacionit shënojnë një nga publikimet e fundit kryesore ekonomike, përpara takimit të ardhshëm të Fed më 18 shtator, kur pritet të ulë normat, nga diapazoni i tyre aktual prej 5.25 në 5.5%, niveli më i lartë në 23 vjet.
Muajin e kaluar, një raport i dobët i punësimit për korrikun, ngjalli frikën e një rënieje ekonomike në SHBA, duke i shtyrë tregtarët të rrisin parashikimet se banka qendrore e SHBA do të ulte normat me një gjysmë pike më shumë se zakonisht në shtator.
Të dhënat për gushtin, treguan se punëdhënësit amerikanë kishin shtuar 142,000 vende të reja pune atë muaj, nga një shifër e rishikuar në rënie prej vetëm 89,000 për korrikun, por ende nën parashikimet.
Fed ka kërkuar siguri se inflacioni po ulet në mënyrë të qëndrueshme, përpara se të ulë normat e interesit.
Por dëshmitë e një përkeqësimi më të mprehtë në tregun e punës, mund ta shtyjnë bankën qendrore të ulë normat në mënyrë më agresive. / FT
Postimi ” Inflacioni në SHBA bie në 2.5% në gusht ” eshte marre nga Revista Monitor.
