Institucionet publike nuk shlyejnë detyrimet financiare ndaj bizneseve edhe nëse këta të fundit e kanë përfituar këtë të drejtë përmes një vendimi gjykate të formës së prerë. Është Avokati i Popullit i cili në raportin zyrtar të punës për vitin e shkuar, e përkufizon fenomenin si mjaft shqetësues, pasi tejzgjatja e proçesit të ekzekutimit të titujve ekzekutiv, pasi e drejta e tyre është njohur nga gjykata, i ka lënë dhe i le palët në pasiguri për periudha të gjata kohore, duke krijuar mundësi për rritjen e kostove proçedurale si dhe zvogëlimin/humbjen e besimit të publikut në sistemin gjyqësor.
Mosrespektimi përmbajtësor i kesaj të drejte, thekson Avokati i Popullit, përbën cenim të interesave pasurore për çdo taksapagues në Republikën e Shqipërisë. Sa i përket shkaqeve që e sjellin këtë, Avokati i Popullit rendit gjashtë shkaqe kryesore: Së pari, mungesa e vullnetit prej autoritetit të administratës publike për përmbushjen e detyrimit të vendosur në dispozitivin e vendimit gjyqësor apo në ligj, kjo dhe në kushtet e pasjes së gjendjes në të holla; mosproçedimi i rregullt i gjykatës administrative në proçesin e shqyrtimit të “Njoftimeve” të përmbaruesit gjyqësor të çështjes për kryerjen e veprimeve të posaçme dhe marrjen e masave të tjera të nevojshme; apo, mungesa e nivelit profesional të përmbaruesve gjyqësorë, i cili shfaqet në veprimet dhe mosveprimet e tyre gjatë procesit të ekzekutimit të titujve ekzekutivë si dhe nxjerrjes së akteve jo në përputhje me legjislacionin në fuqi.
Në raport bëhet gjithashtu me dije se në dhjetor të vitit të shkuar Avokati i është drejtuar disa institucioneve për ta adresuar këtë problematikë, ku në thelb u kërkon këtyre të fundit të parashikojnë në buxhet fonde për të shlyer vendimet e prera gjyqësore, duke qenë se ky është edhe një prej juftifikimeve të tyre kryesore për mosekzekutimin e vendimeve.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
