Pas Beratit, edhe Drejtoria e Shërbimeve të Transportit Rrugor Durrës do të vetëprodhojë energjinë elektrike të nevojshme, përmes investimit në panele fotovoltaike. Me një vlerë prej 17 mln lekë, pa TVSH, Drejtoria e Përgjithshme e Shërbimeve të Transportit Rrugor ka shpallur kompaninë fituese që do të zbatojë projektin.
Referuar dokumenteve të tenderit, fitues është shpallur bashkimi i operatorëve “HTM” dhe “BE – IS, teksa në garë morën pjesë edhe 4 kompani të tjera. Përmes investimit në panele diellore për prodhimin e energjisë nga dielli synohet që këto institucione të plotësojnë nevojat e tyre për energji elektrike, teksa edhe kthimi i investimit parashikohet të jetë relativisht i shpejtë.
Kjo përmes kursimit që vjen nga fatuart e energjisë elektrike, duke qenë se ato shkojnë drejt zeros. Për drejtorinë e Beratit, kthimi i investimit që u finalizua pak ditë më parë parashikohet të bëhet brenda 6 vitesh, ndërsa për Durrësin nuk është bërë ende publik afati konkret, ndonëse vlerësimet e përgjithshme tregojnë për investime të tilla japin të njëjtat shifra.
Vetëprodhimi i energjisë për qëllime autokonsumatore ka pak vite që aplikohet në vendin tonë, duke mundësuar lidhjen me rrjetin e shpërndarjes dhe së fundmi edhe bilancin vjetor të energjisë. Të dhënat zyrtare tregojnë se në total, kapaciteti i instaluar në vend është rreth 120 MW.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
