Nga Athina, qeveria shqiptare i ftoi kompanitë greke të rrisin investimet e tyre në Shqipëri, për të rikthyer marrëdhëniet ekonomike në nivelet e dikurshme. Kjo sepse që prej krizës ekonomike, mbi një dekadë më parë, grekët janë tërhequr me shpejtësi nga tregu shqiptar.
Që nga shitjet e njëpasnjëshme të bankave greke, që sot nuk kanë më gjurmë në sistemin bankar, tek shitja e aksioneve në telekomunikacion, prezenca e investimeve të huaja direkte nga Greqia janë pakësuar 5 vitet e fundit nga 1.2 miliardë euro, në pak më shumë se 200 milionë euro.
Gjatë forumit Greko-Shqiptar, ministrja e Financave ftoi fqinjët të investojnë në sektorët potencialë, duke cituar lehtësitë e ndryshme fiskale, zhvillimin infrastrukturor të viteve të fundit dhe digjitalizimin e shërbimeve. Por sipas ekspertëve, Shqipëria ka pak për të ofruar në krahasim me rajonin.
Marrëdhëniet ekonomike me Greqinë kanë mbetur pas edhe në fushën e tregtisë, ku pavarësisht rritjes së shkëmbimeve, pesha në raport me totalin e mallrave të shkëmbyera ka rënie të ndjeshme. Llogaritet se në vendin tonë operojnë rreth 760 biznese greke.
Burimi: A2 CNN
