Intervistë me z. Shefqet Kastrati, President i Kastrati Group
Kastrati Group, më i madhi në vend, është diversifikuar ndjeshëm vitet e fundit, nga karburantet në infrastrukturë ajrore, ndërtime, turizëm, energji, sigurime. Z. Shefqet Kastrati, CEO i Kastrati Group, pohon se kompanitë e grupit, në vitin 2023 kishin ecuri shumë të mirë.
Ai veçon Aeroportin Ndërkombëtar të Tiranës, si një histori suksesi, ku deri në fund të muajit gusht ka mirëpritur 7,3 milionë pasagjerë dhe parashikon që këtë vit të tejkalojë shifrën e 10 milionë pasagjerëve.
Grupi do të fokusohet gjithashtu në fushën e turizmit dhe specifikisht atë të hotelerisë, ku aktualisht janë angazhuar në projektet e dy hoteleve të mëdha ndërkombëtare, si Hyatt Regency dhe Hilton Tirana.
Një sektor tjetër me potencial për të investuar në të ardhmen është energjia e rinovueshme.
Si do ta vlerësoni ecurinë e Grupit Kastrati në vitin 2023 dhe pjesën e deritanishme të vitit 2024?
Kompanitë e Kastrati Group kanë pasur ecuri pozitive gjatë vitit 2023 dhe deri në gjysmën e vitit 2024. Kjo performancë e mirë i ka dhënë mundësi grupit të zgjerohet më tej edhe për sa u përket burimeve njerëzore, si në nivel drejtues, ashtu edhe zbatues.
Kastrati Group i vlerëson burimet njerëzore, si një ndër asetet kryesore të biznesit, me kontribut të drejtpërdrejtë në zhvillimin e mëtejshëm të tij. Përgjithësisht, ekonomia e vendit është zhvilluar me ritme të kënaqshme dhe më vjen mirë që edhe kompanitë e grupit tonë kanë kontribuar në këtë rritje.
Trendi pozitiv ka vijuar edhe gjatë vitit 2024, ku rezultatet e 6-mujorit të parë reflektojnë rritje të mëtejshme të të ardhurave.
Ndërkohë dua të veçoj Aeroportin Ndërkombëtar të Tiranës, si një histori suksesi për rritjen e jashtëzakonshme. Nga muaji janar deri në fund të muajit gusht, TIA ka mirëpritur 7,3 milionë pasagjerë, 56% më shumë se sa në të njëjtën periudhë të vitit 2023. Sipas parashikimeve pritet që deri në fund të këtij viti të tejkalojmë shifrën e 10 milionë pasagjerëve, diçka e paimagjinueshme vetëm disa vite më parë.
Për shkak të rritjes së shpejtë të numrit të pasagjerëve, por edhe zgjerimit të linjave dhe mundësive të fluturimit për qytetarët shqiptarë dhe ata europianë, aeroporti ka marrë disa vlerësime ndërkombëtare, duke u vlerësuar si një nga aeroportet me rritjen më të shpejtë në Europë.
Gjithashtu ai u veçua së fundmi, si një shembull i progresit të Shqipërisë nga Presidentja e Komisionit Europian, Ursula Von Der Leyen, dhe kjo gjë na bën vërtet krenarë. Nuk është rastësi që investimet më të mëdha të grupit janë përqendruar në Aeroportin Ndërkombëtar të Tiranës, ku që prej fillimit të koncesionit janë investuar rreth 120 milionë euro.
Cilat janë pritshmëritë e Grupit për periudhën në vijim?
Në 5 vitet e ardhshme mendoj që zhvillimi i vendit do të vijojë me ritme të shpejta, kjo ndikuar edhe nga orientimi dhe synimi për t’u bërë pjesë e Bashkimit Europian.
Në këtë kuadër, edhe nga ana e biznesit, në veçanti e grupeve dhe kompanive të mëdha, kërkohet më shumë angazhim dhe më shumë investime. Kastrati Group synon të luajë rol të rëndësishëm në zhvillimin ekonomik të vendit.
Ne kemi për qëllim jo vetëm që kompanitë e grupit të rriten më tej, por mbi të gjitha të japin edhe më shumë kontribut në rritjen e investimeve. Grupi do të fokusohet gjithashtu në fushën e turizmit dhe specifikisht atë të hotelerisë, ku aktualisht jemi angazhuar në projektet e dy hoteleve të mëdha ndërkombëtare si Hyatt Regency dhe Hilton Tirana. Pjesëmarrja e këtyre markave të njohura, përveç rritjes së kapaciteteve pritëse, do të sjellë më shumë standarde në fushën e hotelerisë dhe turizmit.
Ne jemi duke parë mundësinë për investime edhe në Jug të Shqipërisë, duke besuar se turizmi është një nga burimet kryesore të zhvillimit ekonomik të vendit. Gjithashtu, në drejtim të hotelerisë dhe turizmit, ne jemi zgjeruar edhe jashtë vendit, duke investuar në blerjen e një hoteli prestigjioz në Majami të Shteteve të Bashkuara të Amerikës. Për ne ishte shumë e rëndësishme të vendosnim një emër shqiptar.
Dua Hotel Miami, tashmë renditet ndër emrat më të mëdhenj të hotelerisë, në një nga qendrat botërore të turizmit. Zgjerimin në Majami e konsiderojmë si fillimin e investimeve tona të rëndësishme jashtë vendit dhe një mundësi për rritjen e mëtejshme të grupit.
Investime të rëndësishme, grupi po kryen edhe në sektorët ku operon, kryesisht në “Kastrati Energy”, përfshirë burimet e energjisë së rinovueshme, hidrokarburet etj. Po ashtu, edhe sektori financiar ka pasur vëmendjen e grupit, i cili operon tashmë përmes dy kompanive të sigurimit, “Albsig” dhe “Albsig Jetë”, si dhe nëpërmjet shoqërive të tjera që ofrojnë mundësi për të diversifikuar investimet, por edhe kursimet, siç janë Fondi i Investimeve Albsig dhe ai i pensioneve private.
Të dhënat e fundit të Censit të INSTAT treguan për një rënie të ndjeshme të numrit të popullsisë me 420 mijë persona më pak në raport me Censin 2011. Si do të ndikojnë të dhënat e Censit në planet tuaja për investime në të ardhmen?
Shqipëria, si një vend në zhvillim të vazhdueshëm, ofron mundësi të shumta për investitorët vendas dhe të huaj. Sidomos gjatë viteve të fundit, këto mundësi kanë qenë të pakonkurrueshme nga asnjë vend tjetër në Europë, për shkak të riskut të ulët gjeopolitik. Shqipëria është anëtare e NATO-s dhe aspiruese për t’u bërë vend anëtar i BE-së (për këtë jam besimplotë se do të ndodhë brenda një periudhe të afërt).
Ne do të vazhdojmë që pjesën më të madhe të investimeve ta përqendrojmë në Shqipëri, duke kontribuar kështu në zhvillimin e vendit. Jemi më të motivuar se kurrë dhe besojmë te kapacitetet, vitaliteti dhe energjitë që kemi ne si komb, ndaj ftojmë edhe biznesmenë të tjerë ta bëjnë këtë në mënyrë që në Censin e ardhshëm të shohim tendenca të tjera.
Është inkurajues dhe trendi i investimeve të huaja. Vitin e kaluar, u shënuan afro 1.5 miliardë euro investime të huaja, ndërsa këtë vit, për 6-mujorin e parë, shifrat ishin përsëri shumë inkurajuese, rreth 750 milionë euro.
Potenciali
Shqipëria, si një vend në zhvillim të vazhdueshëm, ofron mundësi të shumta për investitorët vendas dhe të huaj. Sidomos gjatë viteve të fundit, këto mundësi kanë qenë të pakonkurrueshme nga asnjë vend tjetër në Europë, për shkak të riskut të ulët gjeopolitik.
Cilët janë sektorët që ju shikoni me potencial në të ardhmen për të investuar dhe planet tuaja të zgjerimit?
Një sektor që e shohim me potencial për të investuar në të ardhmen është energjia e rinovueshme. Duke qenë se themelet e biznesit dhe zhvillimin më të madh, Kastrati Group e ka pasur tek energjia, si të gjitha kompanitë e mëdha energjetike në botë, është e nevojshme që të ecim me hapin e kohës, duke eksploruar edhe mundësitë që ofron energjia e rinovueshme.
Gjithashtu, ky transformim është edhe një detyrim moral ndaj shoqërisë që të kalojmë nga burimet e energjisë me lëndë djegëse, në burime alternative, në harmoni me mjedisin. Industria tjetër që e vlerësojmë me potencial për t’u zhvilluar, siç e përmenda më lart, është industria e turizmit.
Kastrati Group do të zgjerojë më tej investimet e tij në sektorin e turizmit, duke afruar edhe marka të rëndësishme botërore, jo vetëm për zhvillimin e mëtejshëm të turizmit, por edhe rritjen e standardeve në këtë sektor.
Grupi juaj po rritet me shpejtësi vitet e fundit. Si e menaxhoni këtë rritje në drejtim të analizës së riskut dhe burimeve njerëzore?
Ekipi ynë, me mbi 4000 punonjës, është padyshim pjesa më e rëndësishme e suksesit të Grupit Kastrati.
Rrugëtimi ynë që prej fillimit, drejt transformimit në një nga kompanitë më të mëdha në vend, ka qenë i jashtëzakonshëm, falë punës dhe përkushtimit të stafit, duke u bazuar në vlera që kanë domethënie për grupin tonë: integritet, inovacion dhe frymë grupi.
Shqipëria ka profesionistë të talentuar dhe ne jemi përpjekur të afrojmë pjesën më të madhe të tyre, duke qenë sa më konkurrues në sektorët ku operojmë. Kastrati Group ka investuar edhe në zhvillimin profesional të punonjësve, me trajnime dhe kurse profesionale.
Një nga shtyllat tona të përgjegjshmërisë sociale është arsimi dhe zhvillimi profesional i të rinjve. Për këtë qëllim, ne kemi prezantuar edhe programin tonë ‘Kastrati for Education’, në mbështetje të rritjes së cilësisë së arsimit, në veçanti atij profesional.
Një shembull në këtë drejtim është edhe ngritja e Kolegjit Profesional Gjerman të Teknologjisë, i cili ka krijuar jo thjesht më shumë mundësi për të rinjtë dhe të rejat për formimin profesional në fushat e teknologjisë, ndërtimit e mekanikës, por edhe ka shërbyer për përgatitjen e një stafi të kualifikuar për kompanitë e Kastrati Group, si Auto Star Albania (përfaqësuesi ekskluziv i Mercedes Benz në Shqipëri) dhe Kastrati Construction.
Sa problematike është bërë gjetja e fuqisë punëtore dhe si ka ndryshuar përqasja ndaj personelit me rritjen e grupit?
Kompanitë e Kastrati Group kanë mbështetur në vijimësi zhvillimin e kapitalit të tyre njerëzor, jo vetëm nëpërmjet trajnimeve dhe rritjes së aftësimit profesional, por edhe nëpërmjet politikave stimuluese të pagave.
Për të qëndruar sa më konkurrues në sektorët dhe industritë ku operojmë, sidomos gjatë viteve të fundit, edhe për shkak të zhvillimeve ekonomike, rritjes së inflacionit, bizneset e grupit kanë ndërmarrë rritje domethënëse të pagave.
Duke qenë një grup i madh kompanish të suksesshme, interesi për t’u bërë pjesë e stafeve tona mbetet i lartë. Një faktor i rëndësishëm është edhe shumëllojshmëria e industrive ku operojmë, gjë që krijon edhe më shumë mundësi për lëvizje ose promovim brenda kompanive të grupit.
Këto elemente na kanë ndihmuar në ndërtimin e strategjisë së rritjes në karrierë për të gjithë ata që na bashkohen dhe besojnë te zhvillimi dhe vizioni ynë.
Dhe me këtë rast, më lejoni t’u bëj një thirrje të gjithë të rinjve, në veçanti atyre të sapodiplomuar, të shikojnë vendet e lira në kompanitë tona dhe të aplikojnë, pasi mundësitë e rritjes dhe zhvillimit të tyre profesionalisht janë shumë të mëdha.
Postimi ” Investimet tona në rritje, ndikim pozitiv në ekonominë e vendit dhe mundësi punësimi për të rinjtë ” eshte marre nga Revista Monitor.
