Ndërsa dy vitet e fundit kanë shënuar një shtesë rekord të borxhit publik prej rreth 2 miliardë eurosh, me nivele të larta huamarrje në tregun e brendëshëm ka nisur edhe viti 2023. Vetëm gjatë muajve janar dhe shkurt Qeveria ka marrë në tregun e brendshëm 83 miliardë lekë borxh, apo rreth 830 milionë dollarë, përmes letrave me vlerë. Sipas të dhënave zyrtare, në muajin janar 2023 Ministria e Financave dhe Ekonomisë zhvilloi shtatë ankande, duke ofruar 35 miliardë lekë në total, prej të prej të cilave 26 miliardë lekë bono thesari dhe 9 miliardë lekë obligacione.
Edhe më i lartë ka qenë niveli i huamarrjes në muajin shkurt. Ministria e Financave dhe Ekonomisë zhvilloi dhjetë ankande në shkurt, duke ofruar 48 miliardë lekë në total, prej të cilave 30.5 miliardë lekë bono thesari dhe 17.5 miliardë lekë obligacione. Raporti i mbulimit varioi nga 0.80 (Ref. 3V) në 3.53 (7V), me dy ankande të pambuluar. Gjithashtu, në muajin shkurt u rihap një obligacion 2-vjeçar, me shumë totale të alokuar prej 4.600 miliardë lekë.
Borxhi publik i Shqipërisë është rritur me më shumë se 2 miliardë euro në dy vitet e fundit, duke kaluar kuotën e 12 miliardë eurove. Shifrat tregojnë se Qeveria po preferon më shumë borxhin e dhënë nëpërmjet letrave me vlerë se sa të dalë jashtë kufijve. Një veprim i tillë është mëse i kuptueshëm duke parë klimën e tregjeve financiare ndërkombëtare, me Bankat Qendrore që kanë rritur ndjeshëm normat e interesit, për rrjedhojë edhe kostot e borxheve qeveritare.
Megjithatë kjo nuk do ta ndalojë qeverinë të emetojë këtë vit Eurobondin e radhës prej 500 milionë eurosh, në një kohë që vlera shumë të larta borxhi priten të merren edhe në tregun e brendshëm, pavarëisht rritjes së fortë që ka shënuar norma e interesave të bonove e obligacioneve. Klimë që e ka detyruar qeverinë të ndryshojë strategjinë e huamarrjes për ta zhvendosur nga borxhi i jashtëm, te borxhi i brendshëm.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
