Vetëm 4 bashki nga 61 në të gjithë vendin kanë kredi në sistemnin bankar vendas, me një total prej rreth 2 milionë euro. Kreditë janë të mbartura që përpara vitit 2014, pasi më tej vendorët e kanë përdorur më këtë instrument. Referuar raportit të CoPlan mbi huamarrjen vendore, në fund të muajit Shtator të vitit 2022, bashkitë Korçë, Vlorë, Elbasan dhe Lezhë rezultojnë të kenë hua aktive në sistemin bankar vendas.
Të dhënat e përditësuara për tremujorin e tretë të 2022 për huamarrjen vendore, tregojnë shlyerje të detyrimeve për rreth 85 milionë lekë krahasuar me vitin 2021 duke regjistruar një nivel total ekspozimi të katër bashkive sëbashku prej 230 milionë lekë apo 2 milionë euro në total. Pavarësisht se marrja e kredive në sistemin bankar është një mundësi financimi në dispozicion të bashkive, huamarrja vendore vlerësohet të jetë një instrument i përdorur nga një grup i kufizuar bashkish në Shqipëri.
Të dhënat nga regjistri i borxhit për qeverinë vendore tregojnë se huamarrja është një instrument i përdorur në vitin 2010 (nga bashkitë Korçë, Pogradec, Vlorë dhe Elbasan) dhe vitin 2014 (bashkitë Korçë dhe Lezhë), me qëllim financimin e projekteve infrastrukturore. Pas vitit 2014, asnjë nga 61 bashkitë nuk rezulton të ketë marrë hua pavarësisht se nevojat për investime vlerësohet të jenë të mëdha dhe buxhetet kapitale të bashkive të pamjaftueshme për t’i përmbushur ato.
Konsumimi i hapësirës për huamarrje të brendshme nga qeveria qendrore duket të ketë lënë pak vend për bashkitë për të aksesuar fonde të reja në funksion të ushtrimit të aktivitetit e tyre korrent dhe kapital. Ndërkohë projekligji i depozitiuar për diskutim në komisionet komisionet kuvendore mbi financat e qeverisjes vendore synon që bashkitë që rezultojnë me kredi të mund të çlirohen nga ato duke filluar nga viti 2024.
Sipas projektligjit, “përdorimi i fondeve të trashëguara dhe të paangazhuara nga viti i kaluar, jo më pak se 30 % e tyre të përdoren automatikisht për shlyerjen e detyrimeve të prapambetura dhe pagimin e nënhuave të papaguara në kohë”. Me nënhua, projektligji, i referohet kredive të marra nga bashkitë për investime, me garantor qeverinë qendrore, të cilat ende nuk janë shlyer.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
