Teksa çmimet e energjisë elektrike në bursë janë tejet të luhatshme, Korporata Elektorenergjetike Shqiptare ka hapur garën për blerjen energjie afatgjatë për 3 ose 5 vite. KESH e argumenton këtë procedurë të pazakontë me detyrimin për të përmbushur të gjithë konsumin e brendshëm për tensionin e ulët dhe të mesëm, ndërkohë që në dokumenetet e zbardhur më herët nga TV justifikohej me nevojën për menaxhimin e kostove.
Sipas procedurës së shpallur synohet lidhja e një kontrate për import energjie 3 dhe/ose 5-vjeçare, ndërsa shitësi do jetë përgjegjës për energjinë e kërkuar, kostot e transmetimit dhe të gjitha pagesat e Kapacitetit Transmetues Ndërkufitar. Gara do të jetë e hapur deri në datën 14 prill, ndërkohë që duke qenë se KESH nuk disponon një platformë për blerje energjie, oferatat do të dërgohen në një adresë e-mail, duke pretenduar se adresa elektronike nuk do të hapet dhe nuk do të aksesohet nga stafi i KESH gjatë fazës së depozitimit të dokumentacionit.
Në dokumentete zbardhur më herët nga TV , korporata përllogariste se çmimi i fiksuar për 5 vitet e ardhshme, të ishte rreth 270 euro/Mwh. Kjo duke iu referuar çmimeve të asaj periudhe në bursë. Ndërkohë që, çmimi mesatar gjatë muajit shkurt 2023 në Bursën Hungareze arriti në 146 euro/MWh. Hapja e kësaj procedure nga Korporata Elektorenergjetike Shqiptare vjen në një kohë kur jo vetëm çmimet në bursa janë tejet të luhatshme, por edhe kur po plainifkohet shtimi i kapaciteteve prodhuese në vend, që do të sjellin një ulje të varësisë nga importi. Në këtë kuadër u morën me qira edhe 2 TEC-et lundures, për të cilët do të paguhet qira 63,000 USD në ditë dhe 31,500 USD si vlerë ditore e Operimit dhe mirëmbajtjes së asetit. Karburanti që do të përdoret për prodhimine energjisë është kosto shtesë për prodhimin e energjisë nga këto impiante.
Ola Mitre /
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
