Ndërsa ndiqet me shumë vëmendje nga aktorët e tregut financiar shqiptar për shkak të pritjeve që rritja e normave të interesit të ketë një efekt negativ në cilësinë e kredisë në afatin e mesëm, huaja me probleme edhe për muajt e verës ka shënuar zgjerim të papërfillshëm. Nga 5.28 në korrik, në muajin gusht, kreditë me probleme në sistem janë shtuar në 5.30%, dike vijuar një trend gradual rritës. Totali i tyre u rrit lehtë duke arritur nivelin e një viti më parë, rreth 37 miliardë lekë. Të dhënat janë raportuar nga Banka e Shqipërisë, sipas së cilës, rënia e cilësisë është vënë re në kategorinë e kredisë afatshkurtër, në sektorin e biznesit, në portofolin e kredisë në monedhën vendase dhe në kredinë në valutë të pambrojtur nga kursi i kembimit.
Ndërkaq, Banka e Shqipërisë raporton se zgjerimi i stokut të kredive me probleme lidhet me kalimin e kredive të mira drejt klasave më pak performuese dhe me një vëllim më të ulët të fshirjeve dhe shlyerjeve të kredive me probleme. Megjithatë, në krahasim me një vit më parë, flukset e reja të huave me probleme janë pakësuar si rrjedhojë e rritjes së masës së shlyerjeve të tyre. Raporti i mbulimit me provigjione të kredive me probleme u rrit lehtë gjatë periudhës, në 65% si rrjedhojë e rritjes më të lartë të stokut të provigjioneve në raport me zgjerimin e tepricës së kredive me probleme.
Gjithashtu, mbulimi i kredive me kolateral paraqitet në nivele të mira dhe u rrit lehtë gjatë periudhës. Sipas llojit të kolateralit, përmirësim të cilësisë së kredisë ka shënuar vetëm kredia e kolateralizuar me pasuri të paluajtshme rezidenciale.
Banka e Shqipërisë bën me dije se bankat tregtare kanë vijuar të kryejnë ristrukturime të kredive, dhe fshirje të kredive të humbura nga bilanci, por vëllimet respektive tregojnë për një rënie të ndjeshme të tyre. Kredia e ristrukturuar gjatë gjashtë muajve të fundit ishte rreth 2 miliardë lekë ose sa 1% e fluksit të kredisë së re të periudhës dhe sa 4.2% e stokut të kredive me probleme. Portofolet e prekura nga ristrukturimi i kredisë lidhen me kreditë në valutë për sektorin e biznesit dhe në mënyrë të veçantë me kreditë e dhëna për industrinë e ndërtimit. Forma kryesore e ristrukturimit e kërkuar nga klientët dhe e miratuar nga bankat ishte zgjatja e afatit të maturimit.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
