Teksa inflacioni qëndron në nivelin e 7.1% dhe interesat e kredive janë të dyfishuara, ekonomia shqiptare regjistron nivele të forta rritjeje, dhe shfaq së fundmi besimin më të lartë historik.
Banka e Shqipërisë raporton se treguesi i ndjesisë ekonomike, u rrit me 6.3 pikë në muajin Mars. Ky indikator llogaritet në bazë të përgjigjeve që biznese të ndryshme dhe qytetarë u bëjnë pyetjeve për situatën aktuale dhe pritjet e tyre.
Kështu, është ndërtimi sektori që udhëheq optimizmin në ekonomi, nisur nga aktiviteti aktual dhe porositë, edhe pse nuk pret rritje çmimesh në vijim. Ndërsa bizneset që ofrojnë shërbime, raportojnë rritjen më të fortë të besimit në muajin Mars, veçanërisht pas rikuperimit të kërkesës.
Rritje të fortë raporton edhe industria, veçanërisht për nivelin e prodhimit dhe porositë nga kontratat për eksport, duke deklaruar edhe pritshmëri për rritje të aktivitetit dhe punësimit gjatë muajve në vijim.
Ndërsa tregtia, ashtu si shërbimet, po përfiton nga rënia e kursit të këmbimit të valutave dhe nga rikthimi i kërkesës në nivele të larta në treg.
Teksa bizneset shprehen të gjitha optimiste, konsumatorët nga ana tjetër deklarojnë rritje të besimit për të disatin muaj radhazi, duke iu afruar niveleve më të larta, qëkurse nisi kriza e çmimeve në Shtator 2021. Qytetarët perceptojnë se shtrenjtimi i mallrave dhe shërbimeve po ngadalësohet ndjeshëm, ndërsa deklarojnë se të ardhurat e tyre po përmirësohen dhe janë gati për t’iu rikthyer edhe blerjeve të mëdha.
Burimi: A2 CNN
