Kryeministri Edi Rama ka komentuar pas vendimit të Entit Rregullator të Energjisë për uljen e çmimit të energjisë nga 9.5 lekë në 8.5 lekë për konsumatorët deri në fashën 700 KWH.
Kryeministri tha se kjo është ulja e parë në historinë e 35 viteve të çmimit të energjisë elektrike. “Ky është një fakt i cili tregon se në çfarë humnere jemi ngjitur në këtë pikë.
Ulja e çmimit është në kundër tendencë të plotë me rajonin dhe kontinentin ku jetojmë ku çmimi i energjisë jo vetëm është rritur por kërcënuar nga rritje të tjera”. Ai shtoi se kjo masë është një masë më shumë se sa e mirë menduar, e diskutuar gjerë në të gjithë nivelet me ekspertizën e brendshme dhe ndërkombëtare, e bazuar në projeksionet e planit strategjik.
Kryeministri tha se synohet që Shqipëria të kthehet në një eksportues neto të energjisë.
Kryeministri vlerësoi dhe diversifikimin e burimeve të energjisë, përtej asaj hidrike. “Falë politikës sonë në fushën e energjisë, Shqipëria është e para në rajon për prodhimin e energjisë solare, por me distancë nga i dyti. Në vendin e dytë është Serbia me ¼ e prodhimit të Shqipërisë, nga pas vijnë Kosova, Mali i Zi dhe Maqedonia e Veriut.
Shqipëria ka sot 10% të prodhimit nga dielli. “Kur hymë në këtë fazë e kishte 0. Sot flasim për mbi 300 megavat. Më e rëndësishëm se kjo, sot në kanalin e investimeve që janë të pritshme, kemi 1300 megavat energji diellore, 1.3 giga. Në total do të arrijmë objektivin e 30% të prodhimit të energjisë totale nga burime të tjera veç ujit”.
Më herët, Enti Rregullator i Energjisë miratoi çmimet e reja të energjisë për familjarët sipas aplikimit të bërë nga Furnizuesi i Shërbimit Universal pjesë e OSHEE.
Konkretisht familjet që konsumojnë deri në 700 KWh të paguajnë një tarifë 8.5 lekë KWh nga 9.5 KWh që është aktualisht me një ulje me 10.5 për qind të çmimit të energjisë.
Çmimi i ri do të jetë në fuqi për periudhën nga 1 shkurti 2025 në 31 dhjetor 2025.
Ndërkohë sa i takon konsumatorëve që janë mbi këtë fashë pra kush konsumon 701 KWh do të duhet të paguajë të gjithë sasinë e energjisë nga KWh 1 në KWh 701 me çmim 9.5 lekë KWh.
Gjatë diskutimeve u nënvizua se fasha 700 KWh përfshin të paktën 80 për qind të konsumatorëve familjarë të lidhur në tension 0.4 kv duke vlerësuar kështu se ndikimi i uljes së çmimit prek një masë të madhe të familjeje.
Ulet me 10.5% çmimi i energjisë, kush konsumon deri në 700 KWh e paguan me 8.5 lekë/KWh
Postimi ” Kryeministri Rama: Synojmë të kthehemi në eksportues neto të energjisë ” eshte marre nga Revista Monitor.
