Ngritjet e njëpasnjëshme të normës bazë të interesit nga ana e Shqipërisë kanë ndryshuar hartën e subjekteve që financojnë borxhin e brendshëm shtetëror përmes bonove të thesarit e obligacioneve.
Nga të dhënat zyrtare për pjesëmarrjen në ankandet, rezulton se bankat dhe institucionet financiare kanë ulur interesin për bonot e obligacionet për pjesën më të madhe të 2022, hapësirë që është mbushur kryesisht nga qytetarët. Në fund të vitit të shkuar rezulton se 12.1% e letrave me vlerë të Qeverisë janë blerë nga individët, të cilët kanë rritur dukshëm pjesëmarrjen në ankande, nga 10.4% në vitin 2021. Ndërkaq, pjesëmarrja e Bankave tregtare, nga 64,1% në vitin 2021, ka rënë në 62,58% vitin e shkuar.
Shkak i kësaj pjesëmarrje kaq të lartë të individëve gjatë vitit të shkuar u bë rritja e yieldeve të letrave me vlerë të Qeverisë, të cilat arritën rekordin me afrimin e muajve të fundit të 2022. Pjesëmarrje që pritet në rënie këtë vit, megjithëse jo në nivelet aq të ulëta të hasura dy apo tre vitet e mëparëshme.
Pjesëmarrja e bankave dhe raporti i mbulimit të ankandeve të letrave të borxhit prej tyre është rritur dukshëm, si tek bonot, ashtu dhe tek obligacionet gjatë muajve të fundit të 2022.
Por faktor tjetër që pritet të reduktojë pjesëmarrjen e individëve në tregun e letrave me vlerë këtë vit është edhe rritja e normave të depozitave nga ana e bankave. Aktualisht në treg gjenden disa oferta të cilat janë shumë afër normave të letrave me vlerë të Qeverisë, në një kohë që yieldet e bonove 12 mujore ranë nën 4% në muajin shkurt.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
