Gjatë vitit 2022 mbi 11.700 kontribues të rinj i janë shtuar skemës së pensioneve, duke bërë që të ketë shenja përmirësimi. Referuar të dhënave zyrtare të Institutit të Sigurimeve Shoqërore të analizuara nga ScanTv, rezulton se numri i individëve që kontribuojnë në skemë e detyrueshme të sigurimeve shoqërore regjistrohet në 755.730 me një rritje të konsiderueshme e cila ka ardhur kryesisht si pasojë e reformës antiinfomalitet, ndërkohë që në këtë numër përfshihen edhe të vetëpunësuarit në bujqësi dhe kontribuesit vullnetar.
Duke përfshirë edhe kontribuesit nga shteti dhe ata me përfitim afatshkurtër, shifra shkon në rreth 801 mijë. Por kush e mban peshën më të madhe të të ardhurave në skemën e pensioneve? Ndër kontribuesit kryesor në arkën e shtetit është sektori privat, i cili zë 48,1 për qind në raport me numrin total të kontribuesve, ndjekur nga institucionet publike të cilat zënë 20.8 për qind, të vetëpunësuarit 16.9 për qind, të vetëpunësuarit në bujqësi zënë 7.7 për qind dhe ata vullnetar 0.9 për qind.
Nëse do të analizojmë performancën e secilës kategori gjatë vitit që lamë pas në raport me vitin 2021, vihet re se firmat private po ashtu kanë kryesuar në rritjen e numrit të kontribuesve me mbi 11 mijë punonjës më shumë.
Ndërkohë rritje ka pasur edhe në institucionet publike me 2263 punonjës të futur rishtazi në skemë si dhe tek të vetëpunësuarit në bujqësi, ku i janë shtuar skemës 3979 kontribues. Ndërsa në kategorinë të vetëpunësuar ka pasur performancë negative, ku rezulton të kenë dalë nga skema 480 kontribues.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
