Pas vitesh të tëra përpjekje, Shqipëria ka arritur që të finalizojë marrëveshjen me Italinë për njohjen reciproke të periudhave kontributive, për efekt pensioni. Në një intervistë dhënë për emisionin “Box to Box”, zv.ministrja e Ekonomisë, njëherazi kryenegociatorja e grupit të punës, Olta Manjani dha detaje mbi mënyrën, sesi do të funksionojë skema.
Sipas Manjanit, pas ratifikimit të marrëveshjes në dy parlamentet respektive, një procedurë kjo që mund të marrë edhe disa muaj të tjerë kohë, qytetarët të cilët janë në prag pensioni mund të aplikojnë pranë Institutit të Sigurimeve Shoqërore në Itali. Do të jetë pikërisht ky institucion, që do të koordinojë punën me Institutin e Sigurimeve në Shqipëri. Për këtë praktikë, thotë zv.ministrja qytetarët nuk do të kenë asnjë kosto.
Marrëveshja parashikon unifikim të periudhave kontributive për efekt pensioni. Thënë kështu, për një emigrantë që ka 12 vite pune në Itali dhe 13 vite pune në Shqipëri do të përfitojë pension në të dyja vendet, për vitet e punës që ka.
Ç’ka do të thotë se do të marrë pension pleqërie në Shqipëri për 13 vite dhe në Itali për 12 vite. Të fituar dalin ata të cilët e kanë mbushur më herët moshën e daljes në pension, pasi për vitet e punës që kanë do të marrin një përfitim shtesë mujor.
Por kjo, sqaroi Manjani nuk nënkupton rillogaritje të pensionit. E pyetur mbi ecurinë e procesit për njohjen e pensioneve me Greqinë, zv.ministrja bëri me dije se është zhvilluar takimi i dytë mes grupeve negociatore.
Aktualisht Shqipëria ka finalizuar marrveshje në fushën e Sigurimeve Shoqërore me 16 shtete, përfshirë këtu Gjermaninë, Austrinë dhe Kanadanë.
Ada Hazizolli/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
