Një kredi me vlerë 64,6 milionë euro nga Banka Europiane për Rindërtim dhe Zhvillim (BERZH) ka për qëllim të rrisë konkurrueshmërinë dhe qendrueshmërinë klimatike të zinxhirëve prioritarë agroushqimorë, të vlerës nëpërmjet ndërhyrjeve në promovimin e bujqësisë inteligjente klimatike dhe aksesit në tregje.
Gjithashtu, synohet rritja e standardeve të sigurisë dhe cilësisë së ushqimit, si dhe forcimi i kapaciteteve të analizave të Ministrisë së Bujqësisë dhe Zhvillimit Rural.
Nëpërmjet këtij financimi pritet mbështetje më e madhe për zhvillimin e qendrave mikro-ushqimore në zonat periferike të qyteteve kryesore në rajonet e përzgjedhura për të ofruar akses më të mirë në treg për prodhuesit vendas, duke mbështetur zinxhirët e shkurtër të furnizimit dhe elasticitetin në furnizimin e zonave urbane me ushqim
Synohet zhvillimi i grupeve tipike të produkteve ushqimore, apo zinxhirëve të vlerës në zona të caktuara me qëllim investimin në drejtim të shtimit të vlerës së produktit, apo transformimin e tij si dhe zhvillimi i një platforme informative për bujqësinë inovative klimatike për të mbledhur të gjithë informacionin përkatës, si llojin e tokës, të dhënat hidrometeorologjike, sensorë për lagështinë e tokës, praktikat bujqësore dhe për të drejtuar fermerët drejt adoptimit të praktikave elastike bujqësore.
Një vëmendje të shtuar merr edhe fuqizimi i skemave të ujitjes dhe të kullimit në zonat me bujqësi intensive dhe kultivim të kultivarëve me vlerë të lartë. Konkretisht do të investohet në skemën ujitëse të Mursisë dhe Divjakës, në skemat alternative për ujitjen në Bashkinë Lushnjë, si dhe modernizimin e sistemeve të kullimit.
Pjesë e financimit do të jetë mbështetja për laboratorët e Autoritetit Kombëtar të Ushqimit dhe pikave të inspektimit kufitar. Kjo do të arrihet nëpërmjet rritjes së kapacitetit institucional për të kryer kontrolle zyrtare për kafshët e gjalla, produktet me origjinë shtazore dhe joshtazore, bimët dhe produktet bimore, si dhe inputet bujqësore, përmirësimit të kapaciteteve inspektuese dhe mbështetjes diagnostike në fushën e sigurisë ushqimore. Ndërkohë, do të zhvillohet kapaciteti i ruajtjes së produkteve përmes ndërtimit të objekteve të magazinimit dhe blerjes së pajisjeve.
Marrëveshje e kredisë me vlerë 64,6 milionë euro nga Banka Europiane për Rindërtim dhe Zhvillim (BERZH) është dërguar për miratim në Kuvend.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
