Zëvendëskryeministrja e vendit, njëherësh Ministër i Infrastrukturës dhe Energjisë, Belinda Balluku pas përfundimit të mbledhjes së Komitetit të Përbashkët Shqipëri-Azerbajxhan u shpreh se Komiteti i krijuar dy palësh arriti në disa konkluzione që më pas u firmosën në një protokoll midis dy grupeve.
Sipas ministres fusha energjetike është ajo që ka interesin më të madh midis dy palëve, duke patur parasysh projektet e rëndësishme që kemi, si gazifikimi i Korçës apo ekspansioni i konsorciumit TAP, gazi i lëngshëm në portin e Triportit të Vlorës dhe shumë projekte të tjera të rëndësishme.
“Por, nga ana tjetër edhe në fushën e agrikulturës, por edhe në fushën e edukimit dhe të kulturës u diskutuan gjatë të gjitha mënyrat sesi mund të bashkëpunojmë nga shkëmbimi i eksperiencave dhe deri tek mbështetja e ndërsjellët midis dy vendeve,” u shpreh ministrja.
Sipas Ballukut një tjetër fushë interesi midis dy vendeve tona është ajo e transportit, duke vënë një fokus kryesor në transportin e aviacionit civil i cili ishte një nga çështjet që u diskutuan sot pasi një linjë direkte midis dy kryeqyteteve Baku dhe Tiranës është një kërkesë e të dyja qeverive.
Ky Komitet, sipas njoftimit për media, është ngritur në një moment shumë të rëndësishëm sic wshtw 30 vjetori i marrëdhënieve diplomatike midis Shqipërisë dhe Azerbajxhanit.
Balluku tha gjithashtu se me firmosjen e protokollit sot tashmë nis puna konkrete për realizimin e gjithçkaje që ndërmorëm dhe u angazhuam sot në tryezën e përbashkët.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
