Duket se konsumatori dhe biznesi kanë më shumë besim në ecurinë e ekonomisë. Sipas të dhënave më të fundit të publikuara nga Banka e Shqipërisë, treguesi i ndjesisë ekonomike rezultoi me rritje 6.3 pikë në muajin mars, krahasuar me shkurtin. Tashmë ky tregues qëndron 13.5 pikë mbi mesataren afatgjatë, niveli më i lartë historik.
Treguesi i besimit të industrisë u rrit me 5.3 pikë përqindje në muajin mars, i ndikuar pozitivisht nga vlerësimet optimiste për prodhimin aktual dhe për kontratat porositëse, kryesisht atyre të eksporteve. Edhe pritjet e bizneseve të industrisë për prodhimin dhe punësimin në të ardhmen janë rritur, ndërkohë, pritjet e tyre për çmimet që do të vendosin në të ardhmen kanë vijuar prirjen rënëse.
Treguesi i besimit në ndërtim u rrit me 3.5 pikë përqindje, duke shënuar nivelin më të lartë historik. Rritja këtë muaj u përcaktua si nga vlerësimet më të mira për aktivitetin aktual ndërtues, ashtu dhe për nivelin e porosive aktuale, ndërsa pritjet për çmimet në të ardhmen janë në rënie.
Në sektorin e shërbimeve treguesi u rrit me 9.1 pikë përqindje ku dy komponentët përbërës, ecuria aktuale e aktivitetit, si dhe niveli i kërkesës, kanë regjistruar rritje të ndjeshme. Edhe pritjet e bizneseve për kërkesën në të ardhmen janë me rritje.
Treguesi i besimit në tregti u rrit me 5.1 pikë përqindje, i ndikuar kryesisht nga vlerësime shumë optimiste mbi ecurinë aktuale të biznesit. Edhe pritjet për punësimin u rritën këtë muaj, por në një shkallë më të ulët se komponenti i parë. Gjithashtu, pritjet për ecurinë e biznesit në të ardhmen dhe për punësimin kanë regjistruar rritje të lehtë këtë muaj. Pritjet për çmimet në të ardhmen u vlerësuan me rënie.
Treguesi i besimit konsumator vijoi prirjen disamujore rritëse, duke u rritur me 3.8 pikë përqindje në muajin mars. Përmirësimi këtë muaj u përcaktua nga pritje të mira për situatën e përgjithshme ekonomike, situatën financiare dhe blerjet në shuma të mëdha për të ardhmen. Por, nga ana tjetër konsumatorët mendojnë se në të ardhmen çmimet do të vijojnë të rriten.
Dorian Koça/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
