Prej ditës së hënë administrata tatimore ka nisur aksionin për kontrollin e tregtimit të produkteve bujqësore dhe blegtorale në tregjet e mëdha, baxhot apo thertoret.
Në kuadër të aksionit të nisur, ministri i Financave, Petrit Malaj u takua me biznese të pakicës të mallrave të bulmetit dhe mishit në qytetin e Lushnjës.
Gjatë bisedës me përfaqësues të këtyre bizneseve, Ministri Malaj theksoi rëndësinë që çdo tregtim nga ana e tregtarëve të pakicës i produkteve bujqësore dhe blegtorale, si produktet e bulmetit apo produktet e mishit, duhet të shoqërohet me faturë fiskale.
Tregtimi i këtyre produkteve përmes shoqërimit me faturë fiskale, theksoi z. Malaj, shërben jo vetëm për formalizimin e tregut, por edhe për garantimin e sigurisë ushqimore për konsumatorët shqiptarë.
“Është shumë e rëndësishme që të kuptohet nga të gjithë tregtarët e pakicës që çdo produkt që ata tregtojnë, qofshin këto produkte të bulmetit, qofshin këto produkte apo nënprodukte të mishit, do të duhet të jenë të shoqëruara me një faturë fiskale.
Kjo jo vetëm në kuadër të formalizimit të tregut, por edhe në kuadër të sigurisë ushqimore.
Duhet të kuptohet që nëpërmjet faturës ne jemi në gjendje të bëjmë një gjurmueshmëri të produktit nga ferma, te tregtari e deri te tryeza e konsumatorëve.
Ju bëj thirrje të gjithë tregtarëve me pakicë që të fillojnë dhe të sigurojnë faturat e tyre të blerjeve për çdo mall që ata blejnë, në mënyrë që jo vetëm të formalizojnë aktivitetin e tyre, por nga ana tjetër edhe të sigurojnë dhe të garantojnë sigurinë ushqimore për konsumatorët shqiptarë”, u shpreh Ministri.
Ministri tha se të gjitha subjektet e tregtimit me pakicë duhet të ndërgjegjësohen mbi detyrimet ligjore, të cilat duhet të zbatohen në mënyrë të drejtë.
Aksioni për formalizimin e tregut të produkteve bujqësore dhe përmirësimit të sigurisë ushqimore në vendin tonë, po zbatohet në bashkëpunim me Administratën Tatimore dhe Ministrinë e Bujqësisë dhe Zhvillimit Rural.
Postimi ” Ministri i Financave apel tregtarëve të pakicës: Fatura tatimore për çdo produkt që tregtoni ” eshte marre nga Revista Monitor.
